Последен гледан филм со рецензија

[Altaïr]

The Wicker Man (1973)

http://m.imdb.com/title/tt0070917/

Хорор/мистерија, од овие две само мистерија може да остане, филмов ако е хорор тогаш не знам што не е.
Буквално ништо страшно нема, иако последната сцена е рангирана на 45 место, на листата 100 најстрашни сцени. Којзнае кој ја правел листата.

Интересен е филмов иначе, полицаецот Хауви оди на еден Шкотски остров во потрага по исчезната девојка. Кога ќе пристигне на островот дознава дека жителите прават некакви пагански ритуали, луд остров на нашки.
Како што поминува времето Хауви наоѓа шокантни докази за девојката. Или на нашки, сам ќе се заебе.

Гледајте го филмов, интересен е.

П.С. Римејкот со Николас Кејџ е тешко срање.

 

[MissChievous]

Only Lovers Left Alive



Станува збор за брачен пар, Адам и Ева, двајца вампири кои после подолго време повторно се среќаваат, но нивното секојдневие е пореметено од посетата на помалата сестра на Ева. Ми се допаѓа како се претставени Адам и Ева, ова е можеби најдобрата претстава на вампири во филм, Tilda Swinton и Tom Hiddleston се совршени. Ми се допаѓа и приказната, заплетот кој се случува помеѓу главните ликови и исто така, пораката која ја носи за денешниот свет.

Трејлер.

 

[Altaïr]

The Hunt for Red October (1990)

http://m.imdb.com/title/tt0099810/

Така е тоа кога се гледаат нови филмови и се пропуштаат одлични филмови како што е овој. Шон Конери и Алек Болдвин во главните улоги, има уште неколку во главни улоги но овие се најпознати.

Дејството е сместено за време на Студената Војна. Советска подморница која не може да се види на радарите е управувана од најдобриот советски офицер, дадена му е наредба да оди со подморницата на вежба.
Но во умот на офицерот се вртат други мисли, наместо на вежба тргнува кон источниот брег на Америка. Кога Американците ќе го видат на радарот (бидејќи заборавил да го уклучи тоа за невидливост) мислат дека Советите ги напаѓаат. Советите праќаат друга подморница за да го уништи Црвениот пред да биде доцна, сите во страв од војна, кој ќе го фати Шон Конери?

Многу добар филм, одличен. Одлична глума и се тоа. 10ка чиста како солза.

 

[Outrider]

The theory of everything (2014)

Филм за Стивен Хокинг физичарот шо се бавел со црни дупки и сингуларитети, сосема добро снимен, одлична главна улога, на моменти човек ќе си помисли дека навистина тоа е Хокинг во количката. Коректно изведена биографија но некако премногу потсетува на Бјутифул мајнд со Расел Кроу и Џенифер Конели.
Можеби и не е така ама споредбата се наметнува сама, и покрај одличната улога на глумецот сепак ја нема драматиката, паранојата и тегобноста на постариот филм со трагична биографија на научник. Сеуште се паметат култни сцени како онаа кога Конели ги виде ѓубреџиите дека навистина доаѓаат навечер...oh wait почнав муабет за Theory of everything... е па тоа, нема нешто по кое ќе се памети, освен одлично доловената главна улога, нема култни сцени, нешто фали... иако нема што да се замери на филмот, ако постои некоја граница помеѓу јаки и незаборавни филмови тогаш на таа граница седи и овој филм, без дополнителен фактор икс кој ќе го пренесе преку границата.
Ако морам да споредам тоа ви е нешто како Рединг или Хал Сити кои постојат во своевидно лимбо меѓу Премиер и Чемпионшип, прејаки за втора а преслаби за прва лига, влегуваат и излегуваат.
Симпатична женска таа жена му и сето тоа но повторно се наметнува споредба со маестралната и неповторлива Џенифер Конели. She casts a long shadow.

Кога сме веќе кај Џенифер кој сака да гледа ненормално добар филм тогаш нека го симне оној со Бен Кингсли и со неа, кога Кингсли игра пребегнат офицер на персиската армија а таа игра жртва на капитализмот. Трогателен филм.
Споменав дека Џенифер Конели е неповторлива?

 

[Хоуп*]

Unknown
http://www.imdb.com/title/tt0450340/?ref_=nv_sr_3

Пет мажи се будат заробени во една напуштена работилница,а никој од нив не се сеќава кој е и како стигнал до таму. Секој во секого, па дури и во себе се сомнева дека е дел од друштвото на "лошите" кои ги заробиле и за кои не знаат што можат да им направат кога повторно ќе им дојдат во посета. Многу неизвесност, нетрпение и недоверба меѓу нив...
Стварно интересно филмче со многу солидни пресврти и интересни дешавки. Кој не го гледал а сака нешто слично ко што сакам јас дефинитивно нека го изгледа. Нема некои познати фаци и дејствието е 90% во прљава работилница, ама е добар! Ептен слабо познат и некако и малце ми е потценет со 6.5 на имдб ама добро, ете јас ќе му дадам една гоооолема 8ка зошто стварно ми се допадна.

 

[Altaïr]

Midnight Run (1988)

http://m.imdb.com/title/tt0095631/

Сигурно се сеќавате на легендарните тандеми како на пример, Гибсон и Гловер во Lethal Weapon, Сталоне и Расел во Tango & Cash, но на малкумина им се познати Де Ниро и Чарлс Гродин. Овој одличен тандем се појави само во еден филм, Midnight Run. После тоа никогаш немаа можност да соработуваат на филм.
Најпрво за филмов бил планиран Робин Вилијамс на местото на Чарлс, и Де Ниро требало да има партнерка со него, но на крајот останале само Чарлс и Де Ниро. И не згрешиле што ги оставиле само нив.

Чарлс во филмов го глуми Џонатан Мардукас, книговодител кој проневерил 15 милиони долари и откако му е платена кауција му се губи секаква трага.
Еди Мускон кој му ја има платено кауцијата на Мардукас, дознава што работел и откако Мардукас ќе избега Еди му се јавува на Џек Волш, поранешен полицаец а сега брка криминалци за пари. Еди му нуди добра сума ако го најде Мардукас и да му го донесе.Погодувате кој го глуми Џек нели? Роберт Де Ниро нормално.

И откако Волш дознава дека Мардукас му бил книговодител на Џими Серано, познат мафијаш со кого Волш нема баш сјајно минато. Одма ја прифаќа работата и тргнува по Мардукас.
За чудо одма го наоѓа и го носи кај Еди, но за да не биде се така лесно тука се луѓето на Серано кои треба да го убијат Мардукас, агентите кои го бараат за да сведочи против Серано и човекот кој е пратен од Еди во случај Волш да зезне работа.
Следи бркотница низ сите градови а Волш и Мардукас откриваат дека имаат нешто заедничко.

Многу добар филм со одлично сценарио за кое се погрижил Џорџ Гало. Музиката е единствената слаба точка во филмов, едноставно не е добра. Има ситни недостатоци кои се предвидливи но тоа нема да го расипе уживањето.

Ако се одлучите да го гледате филмов, ве чека мешавина на жанрови, одлична глума, смешни дијалози и 2 часа забава.

Вакви филмови повеќе не се прават, верувајте.

 

[Altaïr]

Tinker Tailor Soldier Spy (2011)

http://m.imdb.com/title/tt1340800/

Режисерот Томас Алфердсон е познат по филмот Let the right one in кој собра позитивни критики од сите. И додека траеше таа негова популарност доби задача одличниот шпионски роман на John La Carre да го пренесе на екранот.
Со својот посебен начин на режирање Алфердсон одлично ги склопува коцките и ни дава филм кој со задоволство ќе го гледаат сите.

Приказната е сместена за време на студената војна и се занимава со Британската служба и нејзиното надмудрување со советскиот шпион.
Филмот почнува со мисија во Унгарија чија цел е откривање на шпионот во британската служба, мисијата тргнува на лошо а најлошо поминува Џорџ Смајли. После една година Џорџ добива понуда заедно со неговите поранешни соработници да го откријат советскиот двоен агент кој се наоѓа длабоко во Британската тајна агенција.

За одличниот заплет виновни се сценаристите кои беа наградени со номинација за оскар. Работите се одвиваат бавно па затоа и филмот трае околу 2 часа, и постојано се создава голема тензија.

За Гери Олдман и неговата глума можам да кажам само браво. Многу добро го одглуми ликот на Џорџ Смајли. Ја имаше и поддршката од неколку добри актери како на пример, Benedict Cumberbatch и Tom Hardy.

Доколку барате трилер со бавна приказна, Tinker Tailor Soldier Spy е вистинскиот избор за вас.

 

[Altaïr]

Arlington Road (1999)

http://m.imdb.com/title/tt0137363/

Еден од моите омилени трилери кој си го репризирам кога сум во можност, како денес на пример.
Вакви филмови се ретки денес, бидејќи денешните психолошки трилери се некако слични едни со други. Овој е малку поразличен.

Мајкл Фарадеј е универзитетски професор кој откако ќе ја изгуби жена му живее заедно со синот Грант и девојката Брок. Од тогаш почнува опсесивно да го проучува тероризмот и таа тема често ја внесува и на своите предавања.
Еден ден вракајќи се од работа по улица сретнува мало дете кое е тешко повредено, го носи во болница и таму доаѓаат родителите на детето Оливер и Шерил, за кои Мајкл дознава дека се негови први комшии веќе два месеци, а тој дури сега ги гледа прв пат.
После тој настан фамилиите се зближуваат но како стануваат се поблиски Мајкл приметува некои нелогични работи врзани со Оливер, и почнува да се сомнева дека Оливер е терорист.

Главна и основна тема на филмов е паранојата. Ова е еден на моменти многу напнат трилер, со мала доза на психологија која создава непријатност кај гледачот.
Крајот е малку предвидлив и во последните 20 минути филмот од многу интелигентна приказна се претвора во акција со многу пукање, без која филмов сигурно можеше да помине. Но добро, мене тоа не ми го расипа впечатокот за филмов.

Сценариото е напишано од Ехрен Кругер кој е познат по филмот Трансформери, за Трансформери не треба вакво одлично сценарио како што е за Arlington Road. Трансформери се друг вид на филм, но за нив некој следен пат ако воопшто ги погледнам.

Што се однесува на глумата, таа е на високо ниво. Џеф Бриџис го глуми Мајкл, но мене не ми се допаѓа толку овој актер. На моменти премногу се труди и е нападен (како мене), добро можеби и улогата го бараше тоа од него но ме сум негов фан.
Мене ме изненади Тим Робинс и баш ми се допадна како глуми. Неговата глума е како самиот филм, не открива премногу а сепак можеме да видиме што се случува. Одлично.

Филм кој ако почнете да го гледате сигурно нема да ви здосади. Филм од кој денешниве творци на психолошки трилери можат да учат како се прави таков трилер.

 

[MoonFairy]

Одличен!
Драма која ги доловува последните мигови од кариерата на еден милионер кој се занимава со аукции на ретки и исклучително скапоцени антиквитети...Човек кој знае само за старини, процена, продажба...човек кој нема блиски, нема пријатели (освен еден), има само соработници и луѓе кои работат за него, нема и никогаш немал жена во својот живот, живее во луксузен дом, сосема сам, има своја скриена соба која е полна со портрети на жени од познати сликари кои ги собирал цел свој живот...обожава да седи во својата бела фотелја и да ужива гледајќи ги многуте насликани жени...
Еден ден добива повик од една млада госпоѓица која сака да и’ направи процена на својата вила и на се’ она што е внатре...Таа страда од агорафобија и не излегува никогаш од вилата...Односите се отпочеток дрски и арогантни за потоа да преминат во една интересна њубовна приказна...
А крајот...крајот е нешто неочекувано...затоа нема да го коментирам


Овој пак го гледав некни на TV 1000...
Прекрасна драма за еден клуб на читатели...мал приватен клуб кои ги обожаваат книгите на Џејн Остин...
Сакаат да ги дебатираат и дискутираат до најситен детал...Приватните животи ги поистоветуваат со оние на ликовите од книгите...
Едната е разведена, а сеуште го сака сопругот, другата е пред афера, третата е заљубена во еден член од клубот, а сака да го прикрие тоа....
Сите ќе извлечат нешто добро и поучно од книгите, а тоа ќе влијае на исходот на нивните проблеми...
Навистина посебна драма која баш ми остави впечаток...

 

[Altaïr]

Mulholland Drive (2001)

http://m.imdb.com/title/tt0166924/

Кога ќе се спомне квалитетен и оригинален режисер, името на Дејвид Линч секогаш ќе се најде меѓу првите.
Таков е и овој филм, еден од најдобрите на Линч.

Филмот ги следи приказните на три ликови, кои се необично испреплетени и поврзани.
Бети е млада неискусна актерка која оди во Холивуд за да направи филмска кариера. Оди кај нејзината тетка во една голема куќа, но таму сретнува непозната жена по име Рита.
Тука добиваме еден флешбек, и ја гледаме Рита како излегува неповредена од сообраќајна несреќна и влегува во првата куќа на која ќе наиде. Но го изгубила помнењето и не знае која е, името го измислила по позната актерка.
Тука почнува заплетот, Бети се одлучува да и помогне на Рита во потрагата по нејзиниот вистински идентитет. Во исто време се случува и приказната на третиот лик, Адам кој е филмски режисер.
Адам добива чудна понуда во која бараат од него да и ја даде улогата во неговиот нов филм на непозната актерка, понуда доаѓа од едни опасни луѓе или поточно од мафијата. Адам ја одбива понудата и почнуваат да му се случуваат чудни работи.

Ова е еден метафоричен и симболичен филм кој покажува каков е тој холивудски свет и какви се опасности има. Визуелно е многу ефектен и се меша помеѓу реалноста и фантазијата, како и она доброто и лошото на Холивуд.
Режијата е типична за Линч, напната и ќе ве заинтересира.

Mulholland Drive не го препорачувам само на фановите на Дејвид, туку на сите што сакаат напнат трилер завиткан во сложена приказна, која останува на гледачот да ја разоткрие.