Раскази - Хумор и Сатира

[Grupa Seirdzii]

ЗАДОЛЖУВАЊЕ


Јас не се согласив, брат ми беше категоричен, мојата сестра бара компромис,
мајка ми крева раменици и се крсти. Татко ми е пензионер.

Сакаме да се задолжиме со кредит од 650.000.000 евра.

Не е проблем дали можеме или не можеме да го враќаме. Впрочем, таа обврска
многу лесно ќе им ја препуштиме на нашите идни генерации. Проблемот е, како
и за што ќе ги трошиме парите.

Јас викам: за структурни објекти !

Брат ми вика: за структурите на власта !

Сестра ми вика: за чоколадо !

Мајка ми вика: немаме леб !

Во тој момент влегува татко ми. Ја става пензијата на маса и брои еднаш, брои двапати,
брои трипати. Никако не можи да разбере зошто неговата пензија е повисока за 650.00
денари.

Не му кажавме оти од радост да не проумри.

Некој веќе предвреме мислел на нас и не задолжил со кредит од 650 милиони евра.

Се разбира, тоа нешто можи да го стори само државата.

Инспирирани од таквиот нејзин потег, и понесени од поучната мисла која гласи : „Државата
за тебе стори се, колку ти стори за државата“, решивме и ние да и се оддолжиме со иста мерка -
и ова задолжување го презедовме врз сопствениот грб.

А..., како ќе го трошиме кредитот !?

Со пензијата.

 

[Grupa Seirdzii]

АКО ЛАЖИ АФОРИЗМОТ, ЛАЖИ И ВИСТИНАТА

7.10. И СЕДМИОТ ДЕН СЕ СЛУЧИ ПОТОП НА ЗАМЈАТА (ОД БИБЛИЈАТА).
24/7. ДЕНА ВО НЕДЕЛАТА СЕ СЛУЧУВА ПОТОП ВО ЗЕМЈАТА (ОД БИБЛИСКА МАКЕДОНИЈА).

ПАТРИОТИТЕ ЌЕ ЈА ЧИСТАТ КАЛТА ОД ПОПЛАВИТЕ.
ПРЕДАВНИЦИТЕ ЌЕ НЕ ВАДАТ ОД ЖИВАТА КАЛ НИЗ ЦЕЛА ДРЖАВА.

ПОПЛАВАТА ДОБРО НИ ДОЈДЕ.
ЌЕ ЈА СФАТИМЕ ГОЛЕМИНАТА НА ОНА МАЛКУ ВОДА ШТО ЈА ИМАМЕ.

МЕНУВАМ ЕВРОПСКИ ОБВРСКИ ЗА ЕВРО ОБВРЗНИЦИ !
ШИФРА – МАКЕДОНИЈА.

НИ ВЕТИЈА ДЕМОКРАТСКИ ИЗБОРИ
НА КОИ СЛОБОДНО ЌЕ МОЖЕ ДА СЕ БИРА САМО ВО САМОПОСЛУГА.

ЗНАМ СИГУРНО ЗА КОГО ЌЕ ГЛАСАМ.
ЗАОКРУЖИВ ГЛАСАЧКО ЛИВЧЕ ЗА СИТА НАША НЕСРЕЌА.

ПРЕВОДОТ НА СТРАНСКИТЕ СЕРИИ СО ГЛАС НА МАКЕДОНСКИ ЈАЗИК ЗНАЧИ ЕДНО:
„ГЛЕДАЈ И СЛУШАЈ, НЕМА ТИ ШТО ДА ЧИТАШ“.
КАКО ВО ПОЛИТИКАТА.

СО ДОМАТИТЕ И ПИПЕРКИТЕ НА ГРАНИЧНИОТ ПРЕМИН КАЈ ЈУЖНИОТ СОСЕД ПОМИНАВМЕ ЛЕСНО.
СЕГА ДА ПОМИНЕМЕ ЛЕСНО И СО ИМЕТО МАКЕДОНСКА САЛАТА.

НА НАШИТЕ НОВИНАРИ ИМ ОДИ ЛЕСНО.
ЌЕ ОБЈАВАТ НЕШТО, ПОСЛЕ ЧЕКААТ ДА СЕ СЛУЧИ.

ДОДЕКА ВЛАСТА СЕ РЕШИ ДА ИЗГРАДИ НОВИ УЛИЦИ И ПАТИШТА,
НОВО ЌЕ БИДИ РУБРИКАТА:
“НЕ ФАЌАЈ КРИВИНИ, СМРТТА ДЕБНЕ И ЗАД АГОЛОТ“.

ПРЕД ОДЛИВОТ НА МОЗОЦИ, ИМ ПРЕТСТОИ ПЕРАЛНА.
ЗАТОА СИТЕ ЗАМИНУВААТ ПРИ ЧИСТА СВЕСТ И СОВЕСТ.

МОЖЕБИ ТОНЕМЕ, НО ТОА Е САМО СОН
КОЈ И ТАКА НИ Е ПРЕТСКАЖАН ВО НАШИОТ СОНОВНИК.

ДА ГО СЛЕДИМЕ ВОДАЧОТ, ОТИ ТОЈ НЕ СЛЕДИ КАКО ГО СЛЕДИМЕ.

ВО НАШАТА ДРЖАВА СЕЕДНО КАДЕ ЌЕ СЕ ИЗМОЧАШ.
НАСЕКАДЕ ИМА НУЖДА ОД НЕШТО.

НАШЕТО МИНАТО Е ИСПИШАНО СО КРВ.
МИНАТОТО ГО ИЗБРИШАВМЕ,
КРВАВИОТ РАКОПИС ГО ОСТАВИВМЕ ДА ГО УЧАТ ПОКОЛЕНИЈАТА.

НЕ САМО ОД РАЈОТ, КАЈ НАС НИ ОД ПЕКОЛОТ НИКОЈ НЕ СЕ ВРАТИЛ.
НЕПОДНОСЛИВО Е ЧИСТИЛИШТЕТО НА ПАТРИОТИ И ПРЕДАВНИЦИ.

НЕКОГАШ, ТОЈ ШТО НЕМАЛО ДА САДИ КОМПИРИ, МУ ЈА СЕЧЕЛЕ ГЛАВАТА.
ДЕНЕС, ТОЈ ШТО НЕМА ДА САДИ ПАРТИСКИ КОМПИРИ, МУ ГИ СЕЧАТ СУБВЕНЦИИТЕ.

ДАЈТЕ НИ ЛЕБ.
ВАШИТЕ ИГРИ И ТАКА СЕ НАРАСНАТИ КАКО СКИСНАТО ТЕСТО.

БОГ ГИ ИЗБРКА АДАМ И ЕВА ОД РАЈОТ.
ВО ДАНОЧНИОТ - ПРИБИРА СЕ ЖИВО И ДИВО.

ОД КНИГИТЕ ГО ЧИТАМ САМО КРАЈОТ.
ОД АФОРИЗМОТ, ПОСЛЕДНАТА РЕЧЕНИЦА.

 

[Grupa Seirdzii]

АКО ЛАЖИ АФОРИЗМОТ, ЛАЖИ И ВИСТИНАТА


МАКЕДОНИЈА Е КЛУЧ ЗА БАЛКАНОТ.
КОГА НЕШТО Е ПРЕДМЕТ НА НЕЧИИ СКРИЕНИ ЖЕЛБИ,
МОРА ДА СЕ ДРЖИ ПОД КЛУЧ.

САКАМ ТУРЦИТЕ ДА СЕ ВРАТАТ ВО МАКЕДОНИЈА !?
ЌЕ ГО ВРАТАТ И ЌОТЕКОТ,
А ОВДЕКА РАЈАТА ЗАСЛУЖУВА И ТОА КАКО ДЕБЕЛ ЌОТЕК.

РАЗУМЕН КОМПРОМИС ?
НАШИОТ ЈУЖЕН СОСЕД ДА НЕ ПРИЗНАЕ ТУКУ-ТАКА,
А НИЕ ДА СЕ ОТКАЖЕМЕ ОД ИМЕТО ВАКА ИЛИ ОНАКА.

ТРЕБА ДА НИ СТАНИ ЈАСНО И СО ДРЖАВНАТА ХИМНА.
ЕДНИ ЈА ПЕАТ РАЗНО ГЛАСНО, ДРУГИ ЕДНОГЛАСНО.
ТОА Е РАЗЛИКАТА МЕЃУ НАШИОТ БАРОК И КЛАСИКА.

НАШИТЕ ПОЛИТИЧАРИ РАБОТАТ ЗА ДОБРОТО НА УМЕТНОСТА.
РАБОТАТ, РАБОТАТ ПА ГРУПНО СЕ ПОРТРЕТИРААТ.

МУ ОДДАДОВМЕ ПОЧИТ СО ТРИМИНУТНО ЌУТЕЊЕ.
ТОЛКУ МОЖЕВМЕ ДА ПРЕЌУТИМЕ.

НА 11 СЕПТЕМВРИ ДВЕТЕ ЗГРАДИ СЕ УРНАА КАКО КУЛИ ОД ХАРТИЈА.
НА 11 ДЕКЕМВРИ, ВЕЛАТ, ЌЕ СЕ УРНЕ БАРОКОТ ОД ХАРТИЈА.

ИМА ОПРЕДЕЛЕНИ И НЕОПРЕДЕЛЕНИ,
ЧЛЕНОВИ НА ПАРТИЈА И КОИ ТОА НЕ СЕ.
А ИМА И НАИВНИ, ЗАБЛУДЕНИ, ЗАТЕПАНИ - ВАЖНИ ГЛАСАЧИ.

СЛАВИМЕ ТУЃИ ГРОБОВИ НА НАША ЗЕМЈА.
КОСКИТЕ НА НАШИТЕ, РАСФРЛАНИ НА ОКУЛУ, ЌЕ ГИ МИРОСА ГОСПОД.
КОГА ВЕЌЕ НЕ ЗНАЕЛЕ ЗА КОГО ГИНАТ.

ВО ДОЈРАНСКО ЕЗЕРО ИМАЛО ЦРВЕНОМЕШЕСТИ ПИРАНИ.
КОМУНИСТИТЕ РАБОТАТ, НЕ МИРУВААТ !

ДРЖАВАТА НИ Е ВО ХАОС.
ВЛАСТА СЕ ОБИДУВА ДА ГО ОРГАНИЗИРА.

РАСТЕВ НА ЗДРАВ И ПРИРОДЕН НАЧИН.
ВОСПИТУВАН СУМ СО СТАП ОД БУКОВИНА И ДАБОВИНА.

ДУРИ ДА МУ ЦРКНЕ КРАВАТА,
ГОСПОД ДАДЕ, ЦРКНА КОМШИЈАТА, ДА ЦРКНИ.

ОСУДЕНИОТ НА ГИЉОТИНА ИМА МОЖНОСТ ДА БИРА:
ГЛАВА ИЛИ ТЕЛО.

КОМУНИЗМОТ Е МРТОВ.
ЌЕ ГО ДОКРАЈЧИМЕ И ФАШИЗМОТ,
САМО ДАЈТЕ НИ КОНЦЕНТРАЦИОНИ ЛОГОРИ.

КОГА СЕ НИША ВЛАДИНАТА ФОТЕЉА,
И ПАРТИСКИОТ НАМЕШТАЈ Е ДОБАР.

 

[Grupa Seirdzii]

И З Б О Р И


Јас сум за тоа работата прво добро да се осмисли, брат ми инсистира сега и одма, сестра ми вели
дека процесот треба да продолжи, мајка ми се двоуми дали вакво нешто ни треба или не. Татко ми
е наглув (всушност, се прави наглув, како и многумина).

Збор стана откако чувме за договорот на четирите парти 11 Декември да се одреди за датум на
кој ќе се одржат следните парламентарни избори.

По веста, во нашиот дом дојде до вистинска политичка дебата, партиско препукување во кое
противникот се крши до крај.

Јас барав најпрво да се овозможи слобода на говорот за сите ослободени, испуштени и откачени
од одговорност за секој вид слобода.
Брат ми бара на народот одма да му се овозможат избори оти меѓу масите веќе се чувствува глад
за изборни манипулации.
Сестра ми бара преговорите да продолжат оти власта сеуште нема исцрпено се што може да
исцрпи од државата.
Мајка ми сака се да остане по старо оти во нејзиниот живот и така со години ништо се нема
сменето.
Татко ми туку претура некакви црни вреќи и прашува како се отвораат од прислушните разговори.

Во екот на жестоката расправа заборавивме дека 11 Декември не е што и 11 Септември, па да
ни се урнат сите кули од барокна хартија, или 11 Октомври, кога обично пукаме со ќори фишеци
во чест на нашето успешно востание, туку дека на тој датум треба да се одржат фер и демократски
избори на кои народот по кој знае кој пат ќе го даде својот глас и стас и гас за да ја оствари својата
вековна слободоумна воља за неприкосновен водач, тотална држава, идентитет со вкрстени ками,
просперитет во јабана и т.н., и т.н.

По долгата расправија дојдовме до заклучок дека за ова прашање треба да се изјасниме на референдум:
да има избори или не.

Прашањето на референдумот гласеше:

„Дали лубеницата е црвена пред да се пресечи, ако се знае дека црвената боја станува црвена само
откако ќе дојде во допир со светлината“.

Или, поинаку кажано: дали оваа власт ја има победата во раце уште пред да се пресече на избори,
ако се знае дека изборите ќе бидат избори само откако ќе дојдат во допир со светлината на нашето
осмо крако сонце на непокорот.

И покрај очекувањата, референдумот пропадна.

Секоја споредба на изборите со лубеница е не соодветна, бидејќи кај нас лубениците обично се
калемат со тикви, а, кога се во прашање тикви, тука блиску е и ѓаволот, а кој со ѓаволот тикви сади,
нему му служат место глава.

Еден храбар и освестен човек рекол дека најголемата мудрост на ѓаволот е во тоа, да не убеди дека
не постои (Бодлер). А овдека, веќе неколку изборни пасажи, да не речам цела една деценија, ѓаволот
е речиси во секој од нас, и не убедува дека не постои. За малку, ќе му поверуваа дури и оние
(не)освестените.

Татко ми, кој е наглув (всушност, се прави наглув, како и многумина), сеуште претура некакви црни вреќи
и прашува како се отвораат од прислушните разговори.

(Си) го бара(ме) ѓаволот.

 

[Grupa Seirdzii]

АКО ЛАЖИ АФОРИЗМОТ, ЛАЖИ И ВИСТИНАТА.


ПАРТИИТЕ КОАЛИЦИРААТ ДА ИЗБОРАТ МЕСТО ВО ВЛАСТА.
САТИРАТА И ДВОРСКИТЕ БУДАЛИ ЌЕ КОАЛИЦИРААТ ЗА МЕСТО ДО ЏЕЛАТОТ.

КОГА НАШИОТ НАРОД ОДИ НА ИЗБОРИ, ТИПУВА КАКО ВО СПОРТСКА КЛАДИЛНИЦА.
БИЛО КОЈ ВЛАДИН ТИМ ДА Е ВО ИГРА, ЗАОКРУЖУВА НИЗОК КОЕФИЦИЕНТ.

НА СТО ОСЛЕПЕНИ АДМИНИСТРАТИВЦИ,
ЕДЕН И ЕДИНСТВЕН Е НАРОДОТ ОСТАВЕН ДА ГИ ВОДИ.

„ЌЕ ВИ ЈА ПОКАЧЕМЕ ПЕНЗИЈАТА И ОТКАКО ЌЕ УРЕТЕ“,
ВЕТИ ВЛАСТА,
„ТАКА ЌЕ ЈА ПОТПОЛНЕМЕ И ВАШАТА И НАШАТА ДУПКА“.

ФАШИЗМОТ ВЛАДЕЕЛ 13 ГОДИНИ.
ЗНАЧИ УШТЕ ТРИ ДО ДЕНОТ КОГА И КАЈ НАС
ЌЕ ВЛЕЗЕ ЦРВЕНАТА АРМИЈА.

ИЗБОРИ ЌЕ ИМА, НО КОЈ ЌЕ ПОБЕДИ ?
НАРОДНИТЕ КРПЕНИ–ДОКРПЕНИ ГЛАСАЧКИ КУТИИ, ИЛИ
ПАРТИСКИТЕ ВРЗАНИ-ОДВРЗАНИ ЦРНИ ВРЕЌИ.

СИТЕ НАРОДНИ МАСИ СЕ ДОБРА ТРПЕЗА ЗА ПОЛИТИЧАРИТЕ.

„ДЕЛЕТЕ СЕ МАКЕДОНЦИ “,
ПОВИКУВА ЗАДГРАНИЧНИОТ КОМИТЕТ.
„САМО ВО ДИЈАСПОРАТА СМЕ ОБЕДИНЕТИ“.

НАШАТА АРМИЈА Е СИЛНА КАКО ПАРТИЗАНИТЕ.
ГИ ИЗДРЖ(УВ)А СИТЕ ОФАНЗИВИ ОД ВЛАСТА.

ДУРИ ОТКАКО ГИ ОТКРИ КОРЕНИТЕ НА СТЕБЛОТО,
МАЈМУНОТ РЕШИ ДА СЕ СИМНЕ ОД ДРВОТО.

АДАМ И ЕВА НЕ УЧЕЛЕ ОД ГРЕШКИТЕ.
НИКОГАШ НЕ СЕ ВРАТИЈА ВО РАЈОТ.

ГО ЧЕКАМЕ ИСУС,
НО СУДСКИОТ ПРОЦЕС МОРА ДА СЕ ПОВТОРИ.
НО, ШТО ПОДАЛЕКУ ОД ЕДИНИЦА.

АТЕИСТИТЕ НЕ ВЕРУВААТ ВО БОЖЈА ПОМОШ,
А, СЕ КРСТАТ ВО ГОСПОД ШТОМ СТАСА СОЛИДАРНА ПОМОШ.

ШПАНСКАТА РЕПРЕЗЕНТАЦИЈА ОДБРА ТАКТИКА НАРЕЧЕНА ТИКА-ТАКА.
НИЕ ОДБРАВМЕ ТУКУ-ТАКА ДА ПРИМИМЕ ЧЕТИРИ ГОЛА.

ПО ТРАНСВЕРОТ ОД ДЕСЕТИЦИ МИЛИОНИ ЕВРА,
ФУДБАЛСКАТА ЗВЕЗДА ПАДНА ВОН СЕБЕ ВО „ЗАЛЕЏЕ“.

БУНДИТЕ ОД КРЗНО ПОБАРАА ДА ИМ СЕ ВРАТАТ ПРИРОДНИТЕ ПРАВА
ОД ЖИВОТИНСКИОТ СВЕТ.
ЖЕНИТЕ, СО ЖИВОТИНКСИ ИНСТИКТ, ПОВЛЕКОА ЦРВЕНА ЛИНИЈА.

ГИ ЗАТВОРИВМЕ КНИЖАРНИЦИТЕ.
КНИГИТЕ ЌЕ СЕ ДЕЛАТ ПО КУБИК НА КВАДРАТЕН САНТИМЕТАР ПАМЕТ.

НАШИОТ ПРЕДСЕДАТЕЛ ЌЕ БИДЕ ИСТ КАКО И СИТЕ ДОСЕГАШНИ.
ВСУШНОСТ, ИЗНЕНАДУВАЊА ЌЕ ИМА: ОД НЕКОЈА ХОТЕЛСКА СОБА,
КОГА НЕКОЈА СОБАРКА ЌЕ ОБЈАВИ ДЕКАИ СЕКСУАЛНО ЈА ВОЗНЕМИРУВАЛ.

ПОРАНО БЕВМЕ ДРЖАВА, ОДНОСНО, ТЕРИТОРИЈА.
СЕГА СМЕ ЗАМО ЗЕМЈА, ОДНОСНО, ДРЖАВНО ЗЕМЈИШТЕ.

ПЕТОКРАКА ЗВЕЗДА И КОМУНИЗМОТ, ОСМОКРАКО СОНЦЕ КАКО
СИМБОЛ НА ШЕСТЕ РЕПУБЛИКИ И ДВЕТЕ ПОКРАИНИ, И АНАТЕМАТА,
ДАВЕТЕ СЕ И ПОНАТАМУ ВО ДЕСПОТИЈАТА.

ОТКАКО ПСИХИЈАТРИТЕ КАЖАА ДЕКА НАРОДОТ НИ Е УМЕРЕН ДЕБИЛ,
ВО СПАС НА ТАТКОВИНАТА ТРГНАВ КАКО ЧИСТ КРЕТЕН.

И ДА СЕ РАСПАДНЕ,
МАКЕДОНИЈА НЕМА ДА ВЛЕЗЕ ВО ЕВРОПСКАТА УНИЈА.

ДЕЕЕНЕС НАД МАААКЕДОНИЈА СЕ РАЃА...
ПОЛЕКА БЕ ЛУЈЏЕ !?
ТЕРМИНОТ Е НА 11 ДЕКЕМВРИ, ГО ЧЕКАМЕ МРТВОРОДЕНИОТ.

 

[Grupa Seirdzii]

11 ДЕКЕМВРИ

Јас не брзав. Прво си го испив кафето на раат, па, со чувство на лична самоувереност,
тргнав да го дадам својот глас, убеден дека со денешните избори ќе се оствари мојата
шарено лика обоена визија за подобра иднина на нашата татковина.
Брат ми уште од сабајле претураше по визбата. Го бараше античкиот шлем и знаме.
Замина со фалангата, извикнувајќи : Александар е наш, сакаме Барок. Неговиот поглед кон
иднината се темели врз реставрација на светите букви на партијата, која во пресудните
историски времиња од минатото, па еве се до денес, стана најголемиот виновник што
нашиот народ сеуште живее во климави времиња.
Сестра ми цело сабајле се шминка и никако да се нашминка. Но затоа ја шминка реалноста
окулу себе, користејќи разни интернет портали, кликови, твитови, статуси, сајтови.
Нејзината иднина ја гледа во намерата да кликне и да кидне надвор од државата.
Татко ми со кантар уште вага на која страна да се определи. Тегот повеќе му паѓа на левата,
но тој е појак со десната рака. Својата иднина ја гледа во центарот - за кардиологија.
Мајка ми е неопределена и нема намера да гласа оти си има многу поважни работи дома.
Нејзината иднина ја гледа од денес до дури само утре, во кујната

Несомнено дека на овој толку долго очекуван ден сите посакувавме да се случат фер,
демократски и кредибилни избори, и ако секој од нас требаше да даде свој личен придонес
за остварување на оваа цел.

Па така, сите тргнавме нешто да придонесеме.

Мене ми требаа само два три чекори од преродбата па да се сопнам од растурената и
малку преостаната држава како легализирана дивоградба. Единствено по што можев
да ја препознам беа анакроно стилизираните фасади и канонади на бесот и стресот
заради ненормалност, криминал и корупција. Со членовите од Партијата на скитници
ги пребаравме сите контајнери, депонии и секакво друго ѓубре кое шета на окулу, случајно
да не налетаме на некакви црни вреќи, фантоми, мртви души, гласачки тела.
Брат ми, откако изборите ги прогласи за смрт или живот, дента воскресна цела една
плејада на гробари, за да закопа живи луѓе. Ги наполни гласачките кутии со фантазмагорични
гласови кој хистерично вриштеа и пиштеа: лидеру наш, ти што го оживи клиентелизмот,
од нас мртво родените, фала ти до смртта твоја.
Сестра ми продолжи со шминкање на изборни монтажи, камуфлажи и секакви други стејлинзи
на разни изборни фаци и лудаци.
Татко ми го понесе товарот на третиот блок и останатите цигли, малтер и преостанат шут.
На избори си понесе своерачно пенкало со вградена камера – и пригушувач. Сакаше во
тишина да го „опали“ својот глас. И онака, во тишина, злокобно, да си запее: „Леле војната,
мамо војната, војната тригодишната“.
Мајка ми готвеше манџа.

Сите заедно се сретнавме после пладне дома. Гласањето беше во тек, а изборните резултати
далеку од својата завршница. Можевме мирно да седнеме и да дискутираме за манџата.

- Ова е добра манџа, - реков - но со вкус на неизвесност.
- Не, - рече брат ми - ова е манџа со вкус и мирис на запршка каква што само ние можеме
да запржеме.
- Не е добро аранжирана. – се вмеша сестра ми – Манџата не е само манџа, треба добро
и да изгледа.
- Сол, фали сол, -викаше татко ми – манџата ептем е невкусна.

Каква и да беше, изборната манџа надвор сеуште вриеше.

Дома, мајка ми, откако ја постави трпезата, ни ја сервираше нејзината манџа.
Рече дека не чека „Македонска салата“, а после следи - „Босански лонец“.
Станавме и со брзање истрчавме на улица. Исплашени и таму „Македонската салата“
да не почне да врие во „Босански лонец“.

 

[Grupa Seirdzii]

АКО ЛАЖИ АФОРИЗМОТ, ЛАЖИ И ВИСТИНАТА


СИТЕ НА ГЛАСАЊЕ !?
БЕЗ ГНАСЕЊЕ И ПОВРАЌАЊЕ,
ОД ИЗБОРНИ БЛУЈАНИЦИ И ПОЛИТИЧКИ ВАЛКАНИЦИ.

ВО ПРЕДИЗБОРНАТА ГРАМАТИКА НА ПАРТИИТЕ,
НЕ ЗАСТАНУВАЈТЕ НА ЗАПИРКИ.
СТАВЕТЕ ТОЧКА.

СИТЕ ПАРТИИ РАЧУНААТ НА 63 ПРАТЕНИЦИ ?
ДАЛИ Е ТОА ВИША МАТЕМАТИКА ИЛИ ВИСОКА ПОЛИТИКА,
ИЛИ, ВЕЛИЧАЊЕ НА ПОЛИТИЧКАТА ГЛУПОС НА КВАДРАТ.

РОДИТЕЛИ, ДРЖЕТЕ ГИ ВАШИТЕ ДЕЦА НА УЛИЦА.
УЛИЧНИОТ РЕЧНИК НА ПОЛИТИЧАРИТЕ ЌЕ БИДЕ ДОБРА ШКОЛА
ЗА ОНА ШТО ПОСАКУВАТЕ ДА БИДАТ ВАШИТЕ ДЕЦА.

„БОМБИТЕ“ ОДЕКНАА И КАЈ ГЛУВИТЕ.
НА ГЛУПАВИТЕ НЕШТО ИМ ПУКНА.

ПАРТИСКИТЕ КАРВАНИ НИ ПОКАЖАА ДЕКА ВО НАШАТА ПУСТИНА
МИТИНЗИТЕ СЕ САМО ВЕШТАЧКИ ОАЗИ.

ДЕСНИТЕ ПАРТИИ СЕ ПОВЕЌЕ ИМААТ ЛЕВА НАВИКА
ДА ГИ НАПОЛНАТ СВОИТЕ ДЕСНИ ЏЕПОВИ.

ЖИВЕЕШ ВО МАКЕДОНИЈА.
А ОД КОЈА СТРАНСКА ЗЕМЈА ДОАЃАШ КАКО ФАНТОМ.

И МЕНЕ МЕ ПРИСЛУШКУВАЛЕ.
А БРЕ, КОГА БИЛО ДРЖАВАТА ДА ЗНАЕ ПОРАНО,
ПРЕД ЈАС ДА ДОЗНААМ ШТО ПРАВИ ЖЕНА МИ.

НАШИОТ НАРОД Е МНОГУ НАПАТЕН.
НАПАТИ И ЌЕ СЕ СЕТИ НА ТОА.

ОТКАКО БАРОНОТ МИНХАУЗЕН СЕ ЖАЛЕЛ ДЕКА ВЕЛЕШАНИ МУ ГО ЗЕЛЕ ЗАНАЕТОТ,
ТРАМП МУ ОДГОВОРИЛ ДЕКА, КАКО И МАЛИТЕ ЛАЖГОВЦИ,
И ТОЈ ТРЕБА ДА СЕ ИЗДИГНЕ ВО ЏИН РАВЕН НА НЕГОВАТА ИМПЕРИЈА.

ИСУСЕ, АКО НЕКОЈ ТИ УДРИ ШАМАР ОД ЕДНАТА СТРАНА ПО ОБРАЗОТ,
СВРТИ ГО КРСТОТ НАОПАКУ И ПОКАЖИ МУ ШТО Е ЃАВОЛ.

СКОПЈЕ ДОБИ ЕПИТЕТ „ПАМЕТЕН ГРАД“.
ВИСТИНСКИОТ ЕПИТЕТ БИ БИЛ – ПАМЕТ НАПАМЕТ.

ВЛАСТА ВО ПРИЛЕП СЕ ПОФАЛИ ДЕКА АСФАЛТИРА УЛИЧЕН КРАК ОД 50 МЕТРИ.
ПРИЛЕПЧАНИ КОМЕНТИРАА ДЕКА КРАКОТ Е СО ДВА КРАЈА КАКО И СТАПОТ.

 

[Grupa Seirdzii]

АКО ЛАЖИ АФОРИЗМОТ, ЛАЖИ И ВИСТИНАТА


ИЗБОРНИТЕ РЕЗУЛТАТИ БЕА ИДЕНТИЧНИ, 50 – 50.
ДОБРА ОСНОВА ДА СЕ ИСПОТЕПАМЕ НА ПРАВЕДЕН НАЧИН.

ГИ ИЗБРКАВМЕ ДОБРОНАМЕРНИТЕ АМБАСАДОРИ.
СЕГА, КАКО ДРЖАВА НА НЕПРИНЦИПИЕЛНИ ДОМОРОДЦИ,
ЌЕ ПРИМАМЕ ЕМИСАРИ – КОНКВИСТАДОРИ.

НА СИРОМАШНИТЕ ДЕЧИЊА ЌЕ ИМ ГО СКРАТЕМЕ НОВОГОДИШНИОТ ОГНОМЕТ.
ВО НОВОГОДИШНАТА НОЌ, ВО ЗНАК НА СОЛИДАРНОСТ,
СВОИТЕ РАЧИЊА ЌЕ ГИ ГРЕАТ НА ЗАПАЛЕН ОГАН ВО БУРИЊА.

НИ ТРЕБА ВЛАДА НА СПАСОТ.
СЕГА СЕ ПОДГОТВЕНИ САМО СЛУЖБИТЕ ЗА БРЗА ПОМОШ
И НОЖЕВИТЕ. ЗА СРЕЌА, ОД ХИРУРГИЈА.

СЛИКАРОТ КОЈ ЈА КРЕИРАЛ ОПЕРАЦИЈАТА „НОЌ НА ДОЛГИТЕ НОЖЕВИ“,
НЕ СЛИКАЛ ПЛАТНА.
КАЈ НАС ТАКВИ ОПЕРАЦИИ КРЕИРААТ ГЛУМЦИ, И НЕ ГЛУМАТ.

ВЛАСТА НА ИЗБОРИ ПОБЕДИ БЛАГОДАРЕНИЕ НА
МЕ(Н)ТАЛНИОТ СКЛОП НА СВОИТЕ ГЛАСАЧИ.
НАСЕКАДЕ ОЛОВНИ ВОЈНИЦИ И БАЛЕРИНИ.

„БОМБИТЕ“ НА ОПОЗИЦИЈАТА ПЕЧАТ КАКО СОЛЗАВЕЦ.
САМО КАЈ СУДИИТЕ ПРЕДИЗВИКАА СОЛЗИ ОД СМЕА.

НАРОДОТ Е ВО КОМА.
ВОДАЧОТ ЈА ЗАГУБИ МЕМОРИЈАТА.

ОДНЕСОВ СПИСОК СО ДЕСЕТ НОВИ МРТВИ ГЛАСАЧИ ВО ПАРТИЈА.
САМО ТАКА ЌЕ ГО НАМАЛЕМЕ ЧЛЕНСТВОТО ВО ОПОЗИЦИЈАТА.

СУДСТВОТО СЕКОГАШ Е ПАРТИЗИРАНО.
ПРИЈАТНО Е КОГА ЌЕ ЧУЕТЕ ДЕКА ПРИ ДЕЛЕЊЕТО НА ПРАВДАТА
ПАРТИЈАТА НЕ МОРА ДА СЕ МЕША.

ПОСЛЕ ПРВИТЕ ДВЕ, МАКЕДОНИЈА ЌЕ СТАНЕ ТРЕТА ЈУГОСЛАВИЈА.
ТРЕТА СРЕЌА ВО НЕСРЕЌА.

ФОРМИРАВ ПАРТИЈА ВМРО – НАМА.
НАШАТА ПАРТИЈА ОД СЕКОГАШ СЕ РАСПРОДАВАЛА КАКО НАРОДЕН МАГАЗИН.

МНОГУ ЕВРОПСКИ ЛИДЕРИ САКААТ ДА ЈА НАПУШТАТ УНИЈАТА.
ЗА ВЛАДЕЕЊЕ, ПОВЕЌЕ БИ ИМ ОДГОВАРАЛА
БИВШАТА ЈУГОСЛОВЕНСКА РЕПУБЛИКА МАКЕДОНИЈА.

ОД ТОЛКУ ЗЛИ ЈАЗИЦИ ОКУЛУ СЕБЕ,
МАКЕДОНИЈА ОДБРА САМО ДВОЈАЗИЧНОСТ.

ТОЛПАТА СТАНА МАСА, МАСАТА НАРОД, НАРОДОТ ПАРТИЈА,
ПАРТИЈАТА ДРЖАВА, ДРЖАВАТА КОРУМПИРАНА ПОЛИТИЧКА ТОЛПА.

 

[Grupa Seirdzii]

ДОДЕКА ЈА ЧЕКАМ НОВАТА ВЛАДА

Не бев сосема сигурен дали времето да го поминам со играње голи ашици,
или да одиграм уште една турска серија во главна улога со мојата сопруга,
ама, мене, ова чекањето за состав на новата влада, ми скисна

Ајде, додека траеше кампањата во предизборието, работите некако беа
интересни. Потоа, одеднаш се замре. Тоа што сите себеси се прогласија за
победници беше сензација, колку што е сензација кога ќе речат дека Скопје
2014 е продолжение на историскиот барок, или, дека сме продолжение на
Античките македонци, а сега, дека тие ти биле продолжена рака на Ќосете,
за на крајот сите да завршиме како продолжено црево на дванајстопалачен
отвор. А, ако нешто навистина деновиве е сензација, тогаш тоа се тековните
преговорите за состав на новата влада кои се издигнаа до сверата на шпекулации
од типот: топка ли е, плоча ли е, Македонија на маф(фамил)ијата мора да е’.

Но, време е да почнам да размислувам разумно: каква влада сакам јас.

На почетокот, одма ги отфрлив сите можни варијанти на веќе познатите стереотипи
од политичката практика, како: политичка, коалициона, концентрациона, техничка,
преодна, демократска, автократска, диктаторска (пардон, таква веќе имавме). Ги
отфрлив и сите влади кои ги имавме во изминат период од 25-годишното постоење
на нашата земја, како што беа оние од типот на носени, недоносени, абортирани,
предвреме родени, килави и т.н. и т.н. Кога државата ќе се доведе во ќор сокак,
обично излезот го бараат слепци.

Во овие пресудни политички моменти за нашата земја, најзначајно за нас е дали
нашата идна влада ќе биде умна или глупава, пресметлива или налудничава,
слободоумна или малоумна, со кичма или без кичма, бисексуална или родово сродна.
Оти, ако на сите досегашни влади нешто им недостигаше, беше тоа здрав разум и
бистра глава. А тоа значи дека некому таму му фалело лекарско, што за дел од
гласачкото труло тело беше прифатено како колективен историски дефект.

И така, шетајќи, втурнат во мислите, го гледам кај иде Господинот Бејли.
- Добар ден Мистер Бејли – му вела.
- Јес, јес – љубезно ми одговара.
- Мистер Бејли, ќе има нова влада или ќе нема – прашав.
- Јес, јес – пак љубезно ми одгвара.
- А кој ќе ја состави: ние, вие, тие, овие, оние – се обидувам да исчепкам.
- Јес, јес – ми клима со главата.

Нормално дека го разбрав.

Ќе имаме коалициона влада составена од сите странски амбасадори, европски емисари,
големи и мали сили, светски влади, земјите од западната хемисвера, оние од
Западен Балкан, а ќе биде проширена и со четирите страни на светот, сите меридијани
и петте континетни.

Нам од секогаш судбијата ни ја решавале други.
Само сме се провирале низ магичниот круг на Господарите на прстените.

П.С.
Во моментов се водат преговори за коа-лиција
Коа таму, работите стасале до полиција
Коалиција со пари не се прави
Се прави со многу пари
Готовина во евра се плаќа
Да небиде мачка во вреќа
За Албанците наши браќа.

 

[Grupa Seirdzii]

И СРБИТЕ СЕ СВРТИЈА ПРОТИВ НАС.
ЗАБОРАВИЈА ОД МИНАТОТО ДЕКА ИМ БЕВМЕ
НАЈГОЛЕМИТЕ (НЕ)ПРИЈАТЕЛИ СЕКОГАШ КОГА ТОА ИМ БЕШЕ ПОТРЕБНО.