Раскази - Хумор и Сатира

[Grupa Seirdzii]

ПРИЛЕПЕ (НЕ)СРЕЌО МОЈА

(Театарски фестивал „В.Чернодрински“
Билтен бр. 5)

Во мојот град театар,
се одржа јубилејниот,
педесет години, Театрален фестивал.

А јас уште глумам, уште глумам.

Црнодрински повторно го обоија во спектаклот на
љубовта кон уметноста, мајка
на сите духовни чеда и секаква беда.

(Од патувачките театри и улични свирачи до актери градоначалници и државни поданици
на кои тоа им стана нај омилената улога).

Melis glosiosus, официјалниот војник на фалбите за победите
во свечан занес
побрза да ги прегрни
и задуши театарските штици.

(За деспотот, нивниот чкрипот секогаш звучел како револуција).

Завесите се кренати.
На сцената почнуваат да се бркаат сенки на духови,
демони, скршени срца, шарлатани, херои.
Гледачот се гуши во сопственото восприемање:

( утешете ме
развеселете ме
трогнете ме
дајте ми да сонувам
насмејте ме
натерајте ме да заплачам
натерајте ме да размислувам
(Ги де Мопасан))

Каде тука завршува реалноста а почнува визијата.

(За нашиот сограѓанин, „Бегалка“ е реалност;
кога ќерката ќе побегни бегалка, тоа е театар).

Во големата глума која како гума се растега врз
мимичката гримаса на актерот-измамник и
гледалиштето
кое сеуште наивно се прашува
дали да му верува на ликот
или имитаторот,
ќе се разоткрие аксиомот:
драмската дружина треба да развесели.
Дајте ни „сапуница“.

(Покојниот Цане Глумецо, одамна, откако отиде во пензија,
ќе речеше: „Доста играв мајмун“).

На сцената одекнува гласот на извежбан вокал,
поставувајќи го нај театарското прашање:
„Да се биде или не“, оти
премногу е смешно да би било поинакво,
одговорот е’.
Го слуша ли публиката тој грлат глас кој повикува на прочистување ?

(Лично, катарзата од секогаш ми предизвикувала страв и трепет:
повикувајќи се на античката трагедија, ја донесовме и сопствената пропаст).

Но !?
ете ме повторно
кој знае по кој пат
одново седнувам во тој
ограничен простор со дрвени столици и
ограничен број на театарски занесеници.
Седнувам како дрвена кукла
и ги влечам конците на сопствените чувства
и вознесение од магијата на сцената.
Да разберам ?

Дали навистина тоа е сон на летната ноќ
или само ги отворам и затворам очите
пред временоста и безвременоста на
театарските штици што живот значат.
Оти мене секојпат ми фали по една штица
штом ќе се најдам пред тетатарските кулиси
кои личат на стар шифуњер
чија содржина
исполнета со износени костуми и шапки
никако да ја проникнам.

А јас уште глумам, уште глумам,

дека уметничкиот плацебо на театарот
ќе ја спаси мојата душа и душата
на мојот град театар.

 

[Grupa Seirdzii]

АКО ЛАЖИ АФОРИЗМОТ, ЛАЖИ И ВИСТИНАТА

ЕКСПЕРТСКА ВЛАДА Е КОГА ФАКУЛТЕТСКИТЕ ПРОФЕСОРИ
ЌЕ ГИ СМЕНАТ СВОИТЕ НЕКОГАШНИ СТУДЕНТИ ВО ВЛАСТА.

НИЕ БИ СЕ ПОМИРИЛЕ ,
АМА СТРАНЦИТЕ ИНСИСТИРААТ НА КОМПРОМИС.

ТОЈ БЕШЕ ПАМЕТЕН ГОВОРНИК, НО ПАРТИЈАТА ГО ТРГНА НАСТРАНА.
СЕГА ДОБРО И ОДИ И ВАКА.

ВЛАСТА ГО МОЛИ НАРОДОТ ДА ОСТАНИ.
НАРОДОТ ЈА МОЛИ ВЛАСТА ДА СИ ОДИ.

СЕ ДОДЕКА НАРОДОТ НЕ ДРЖИ СТРУЈА,
СОСТОЈБАТА ЌЕ БИДИ НУЛА ФАЗА.

НА СМЕТКА НА НИВНАТА ДЕМОКРАТИЈА,
СТРАДА НАШАТА ДЕМОГРАФИЈА.

ОД КРИЗАТА ЌЕ ЈА ИЗВЛЕЧЕМЕ НАЦИЈАТА ИЛИ ДРЖАВАТА,
ОТИ И ДВЕТЕ СЕ ВРТАТ ВО ИСТ БАРАБАН ЗА ИГРИ НА СРЕЌА.

ПОМЕЃУ НАШИОТ БУЏЕТСКИ БАЛАНС И РЕБАЛАНС,
ЕДИНСТВЕНО СТАБИЛНА Е НАРОДНАТА СИРОМАШТИЈА.
ОБЈАВИ НАРОДНАТА БАНКА.

КАЈ НАС И ГЛУПАВИТЕ СЕ ЛЕЧАТ НА ДРЖАВЕН ТРОШОК.
КОЈ МОЖИ ДА РЕЧИ ДЕКА ДРЖАВАТА НЕ ВЛОЖУВА ВО НЕИЗЛЕЧИВИ.

ЗА НАШИТЕ БОРБЕНИ ТРАДИЦИИ СЕ ПЕЕ ВО ПЕСНИТЕ .
ОД ГЛЕДНА ТОЧКА НА ИСТОРИЈАТА СЕКОЈПАТ НИ СВИРЕА СО КУРШУМИ.

КРАЈОТ НА ЕДНА ВЛАСТ ЈА ОДРЕДУВА ЦЕНАТА
СО КОЈА ЃАВОЛОТ СИ НАПЛАЌА.

„ВЛЕЗЕТЕ, ОВДЕКА Е РАЈ“,
ЗАД ПОРТИТЕ НА ЗЕМЈОДЕЛСКИТЕ СУБВЕНЦИИ СЕ ЧУ ГЛАСОТ НА КАИН.

МНОГУМИНА ЈА ВКУСИЈА ШВЕДСКАТА МАСА,
НО ОСТАНАА РАЗОЧАРАНИ.
ТАМУ НЕ САМО ШТО СЕ РАБОТИ, ТУКУ И СТОЕЧКИ СЕ ЈАДИ.

МЕСТО ДА ВОДИМЕ ЈАВЕН ЖИВОТ, ВОДИМЕ ЈАДЕН ЖИВОТ.

ГИ НАМАЛИВМЕ КАЗНИТЕ.
И КРИМИНАЛЦИТЕ ДА ПОЧУСТВУВААТ НЕШТО ОД РЕФОРМИТЕ.

ЗА ПОВТОРНО ЗАЖИВУВАЊЕ НА СЕЛАТА,
ВО СЕКОЕ ОД НИВ ИНВЕСТИРАВМЕ СО ПО ЕДЕН
ТРАКТОР, ЕДЕН ПЛУГ И ЕДЕН СЕЛАНЕЦ.

КОГА ВИНАТА СТАНУВА КОЛЕКТИВНА ОДГОВОРНОСТ,
ЛЕСНО СЕ НАОЃА ОСУДЕНИК КОЈ ЗА ТОА ЌЕ ОДЛЕЖИ

ОНАКА КАКО СЕ ОДНЕСУВАМЕ ПРЕМА СОПСТВЕНИТЕ РЕЛИГИИ,
ПОВЕЌЕ ЛИЧИМЕ НА НАВИВАЧКИ ГРУПИ ОТКОЛКУ НА ВЕРНИЦИ.

БИБЛИЈАТА Е ПИШУВАНА ПО МЕРКА НА ЧОВЕКОТ.
БОГ ЗЕМА МЕРКА КАКО МУ Е ПИШАНО.

НАШИОТ ПЛИВАЧ ИСПЛИВА ПОД СВОИТЕ МОЖНОСТИ,
ОД ЛИЧНИТЕ МОЖНОСТИ ДА ПОТОНИ ДО ЦЕЛТА.

ОД СЕТО ОВОШЈЕ,
ПРОДАВАЧКАТА МИ ПОНУДИ ОД ЗАБРАНЕТОТО ЈАБОЛКО.
ДА НЕБЕА КАМЕРИТЕ НЕМАШЕ ДА МЕ ИЗБРКААТ ОД РАЈОТ МЕЃУ ТЕЗГИТЕ.

ВРВИ КОМБЕ СО НАМОНТИРАН ЗВУЧНИК.
„КУПУВАМ СТАРО ЖЕЛЕЗО, ШПОРЕТИ, БОЉЕРИ, АКУМУЛАТОРИ... ,
ПЛАЌАМ НА ЛИЦЕ МЕСТО ВО ГОТОВО“
Е..., ТО ТИ СЕ ВИКА ЕКОНОМИЈА.

КОГА НА ОСУДЕНИКОТ НА ЕЛЕКТРИЧНА СТОЛИЦА
МУ ЈА ПОКАЖАА СМЕТКАТА ЗА СТРУЈА, СЕ РЕШИ ЗА ПЛИН.
ЌЕ ГО ЧЕКА ТУРСКИ ПОТОК.

ПРОСЕЧНИОТ ЖИВОТЕН ВЕК ЗА МАЖИ ВО 2014 ГОДИНА
КАЈ НАС ИЗНЕСУВА 69 ГОДИНИ.
СЛАТКА СМРТ ВО НАЈСПЕКТАКУЛАРНАТА СЕКСИ ПОЗА.

ОТКАКО ГИ ЗАСАДИВМЕ ВЛАКНЕСТИТЕ ПАЛМИ,
МОЈАТА ЖЕНА ПОВЕЌЕ НЕ ГИ БРИЧИ НОЗЕТЕ.
САКА ДА БИДИ ВО ТРЕНД.

 

[Grupa Seirdzii]

ПРИЛЕПЕ (НЕ)СРЕЌО МОЈА

По кражбата на мајмунче од золошката градина, прилепчани изразија
голема загриженост за својата безбедност.

Ама...!? че му се фата за стапо.
Во Прилеп појче мајмун не игра. Сега во игра се горила и секакви други зверки.

Овдека не почнала еволуцијата, почнала револуцијата.
Откако револуцијата ја прегази еволуцијата, многу луѓе се преобразија во човеколики мајмуни,
па оттука и легендата за мајмунот на кој неможи никој да му се фати.

Патот на еволуцијата по системот на природна селекција во револуцијата допринесе
многумина кои досега личеа на луѓе, сега да можат да се издигнат до планета на мајмуните.

На екраните се врти само тој филм.

Оние кои предвреме се симнаа од дрвото на еволуцијата,
сега копаат по сопствените корењe. Тие што останаа да висат на фамилијарното стебло,
еволуцијата ги качи на уште повисоки гранки.

Што ќе речи се доближија до нивните првобитни црвеногазести роднини.

И така, одам јас на една свадба како кум, ама, гледам нешто ми фали,
па му велам на сватојте: „оти занас нема банани“.
„Прво слезете оддрво“, ми велат.
„Абе слезени сме ние уште од времето на мезозоико, ама немој сега да се налутиме
па пак да се качиме на дрво, та дури тогаш че не молите елате слезете че ви се фатиме“.

Сакам да речам, со прилепчани мајтап не се игра оти и невестата
можи да остани без да се фати за орото.

Мајмунчето кое беше украдено, пак е вратено во својата природна средина.
Занего кафезот е од оваа страна.

Ви градот под Марковите кули близначки решетки нема. Сите слободно се шетаат.
Џунглата за сите е заедничка.

 

[Grupa Seirdzii]

АКО ЛАЖИ АФОРИЗМОТ, ЛАЖИ И ВИСТИНАТА

ВО ЗАПАДЕН БАЛКАН, ДРЖАВАТА СЕВЕРНА МАКЕДОНИЈА СЕ НАОЃА
НА ЈУГОТ ОД ПОЛУОСТРОВОТ, ИСТОЧНО ОД РАЈОТ.

КАЈ НАС СЕКОЈ ВТОР Е БЕДЕН.
АКО НЕ ЈАС, ТОГАШ МОЈАТА СЕНКА ОД ЧОВЕК.

ДЕМОКРАТИЈАТА КАЈ НАС ИМА ДВЕ ФАЗИ.
ПРВО ЌОТЕК, ПА ПОСЛЕ СЛОБОДА НА ИЗРАЗУВАЊЕ НА СТРАВОТ.

ИМАВМЕ ПРЕМИЕРИ, НО СЕКОЈА НИВНА ПРЕМИЕРА БЕШЕ РЕПРИЗА
НА ТОТАЛИТАРНАТА УМЕТНОСТ НА ВЛАДЕЕЊЕ.

ПАРЛАМЕНТОТ СЕ КОМПЛЕТИРА.
ДАЈТЕ МУ ВРЕМЕ НА ИЗБАЦИВАЧИТЕ.

И ДОСЕГА ИМАВМЕ СПЕЦИЈАЛНИ ОБВИНИТЕЛИ.
ЗА СПЕЦИЈАЛИСТИЧКИ ТРЕТМАН ВРЗ НЕВИНИ ДУШИ.

ВО ИГРА Е СПЕЦИЈАЛЕН ОБВИНИТЕЛ ШКОЛУВАН НА СИЦИЛИЈА.
И МАФИЈАТА ВО ПАРТИЈАТА (ШАХ) СПРЕМА СИЦИЛИЈАНСКА ОДБРАНА.

ДОБРОНАМЕРНАТА НАСМЕВКА НА СПЕЦИЈАЛНИОТ ОБВИНИТЕЛ
ПОВЕЌЕ ЛИЧИ КАКО ДА САКА ДА НИ СВАРИ КАФЕ СО ШЕЌЕР.
ОТРОВОТ ДЕЛУВА НАКНАДНО.

АКАДЕМИЦИТЕ МОЛЧАТ.
ЧЕКААТ СПЕЦИЈАЛНИОТ ОБВИНИТЕЛ ДА ЈА НАПИШИ ИСТОРИЈАТА
ПА ДА ОБЈАВАТ ЕНЦИКЛОПЕДИЈА.

БОДЛИКАВИ ЖИЦИ НА НАШИТЕ ГРАНИЦИ !?
МОЖЕБИ НЕКАКВА КОЛЕКТИВНА КАТАРЗА ЗА ГРЕШКАТА СО
БЕГАЛЦИТЕ ОД ЕДНА ДРУГА ГЕНЕРАЦИЈА.

ЦРКВАТА И ВЛАСТА НИ ПОДАДОА РАКА.
НА ВЛАСТА ЌЕ И СЕ МОЛИМЕ СО ДЕСНА,
НА ЦРКВАТА ЌЕ И СЕ КРСТИМЕ СО ЛЕВА РАКА.

НАШИОТ НАРОД НЕ ДЕКА НЕМАЛО ШТО ДА ЈАДИ.
ВАЖНО БИЛО ДУШМАНИТЕ ДА БИДАТ СИТИ.

ПАРТИЈАТА ЈА ОСВОИ ВЛАСТА СО ИЗБОРНИ
СЕЧЕНИ, ЛЕПЕНИ И КРЕИРАНИ КАРТОНСКИ КУТИИ.

МЛАДИТЕ НЕ САКААТ ДА ОБРАБОТУВААТ ЗЕМЈА.
САКААТ ДА ОДРАБОТУВААТ ВО ДРУГА ЗЕМЈА.

ЗА СЛЕДНИТЕ ГЕНЕРАЦИИ УЧЕНИЦИ, ПРАШАЊЕ НА ЕКСТЕРНО:
КОГА Е ИЗГРАДЕН БАРОКОТ „СКОПЈЕ 2014“.

СТО ПАТИ КАЖАНА ЛАГА, СТАНУВА ВИСТИНА.
СТО ПАТИ КАЖАНА ВИСТИНА, СТАНУВА ДОКТОРСКА ДИСЕРТАЦИЈА.

ИМАМЕ ЕЗЕРСКИ ВОДИ, ИМАМЕ РЕЧНИ ВОДИ, АКУМУЛАЦИИ, КАНАЛИЗАЦИИ...
СО ЕДЕН ЗБОР, ШИРОКО РАЗВОДНЕТА МРЕЖА ЗА ПОПЛАВИ.

ЈАС СУМ ВОНСЕРИСКИ ЛОПОВ.
ВЛЕГУВАМ И ИЗЛЕГУВАМ ПРЕД И ПОСЛЕ ГЛЕДАЊЕТО СЕРИСКИ ФИЛМОВИ.

СЕ ТЕЧИ СЕ СЕ МЕНУВА,
МУ РЕЧЕ БОЊЕРОТ НА КАДАТА.

СМРТТА Е КАКО ПРОСЈАК.
ГОЛА И БОСА, И ИЗГЛАДНЕТА ДО СМРТ.

ПО УВИДОТ, БОГ ЈА КОНСТАТИРА НЕГОВАТА СМРТ.

ЕПИТАФОТ Е ПОВРШЕН ОПИС.

СЕКОЈА ШУПЛИВА БР(ГЛ)АВА СЕ ОТВОРА СО КАЛАУЗ.

НИГДЕ ВО СВЕТОТ НЕМА СИРОМАШНИ ТУРИСТИ.

И ПОКРАЈ СИТЕ ШАХОВСКИ ОТВАРАЊА,
ШАХОТ СЕ ИГРА СО ОТВОРЕНИ КАРТИ.

ПАРТИЈАТА ШАХ ЈА ЗАПОЧНА СО ПРЕДИЗБОРНО ОТВОРАЊЕ.

ВИСТИНАТА ИМА ПОВЕЌЕ ЛИЦА – КОИ ЌЕ ТВРДАТ ДЕКА Е ЛАГА.

САМО НАРОД ШТО ПАСИ ТРЕВА
ЗА СВОЈАТА ИДНИНА МОЖИ ДА ГАРАНТИРА ДЕКА ЌЕ БИДИ СИТ.

ЛУСТРАЦИЈАТА НЕ УСПЕА ДА НЕ УБЕДИ ДЕКА КАЈ НАС СЕКОЈ ТРЕТ Е
КОДОШ, СЕКОЈ ВТОР ПОТКАЖУВАЧ, СЕКОЈ ПРВ ШПИУН.

ПО ОДЛИВОТ НА МОЗОЦИ,
СЕГА НИ НАЛЕВААТ КАПКА ПО КАПКА УМ.

ИДНИНАТА Е ЗАД НАС, СЕГАШНОСТА НАПРЕД, МИНАТОТО ТУКА.
ИСТОРИЈАТА БАРАЈТЕЈА ВО КВАНТНАТА ФИЗИКА.

 

[Grupa Seirdzii]

ОД МОЈОТ ШКОЛСКИ ДНЕВНИК
ПО ГЕОГРАФИЈА

Пред Гагарин,
мувите биле првите космонаути
облетувајќи го школскиот глобус.

А мене сеуште ми трпнат дланките
од ударите на наставничката по географија
затоа што на географската карта
неможев да го најдам Париз.

И земав дополнителни часови
по сите светски јазици
за да ги преведам географските поими
за геостратегијата на мојот мајчин јазик.

А наставничката по географија
со својот долг јазик лепеше
таксени марки врз скриените мисли за еросот
долж сите меридијани.

А таткоми ми објаснуваше
за времето кога географските карти
се цртале со пароли за братство и единство.
Jас цртав национални граници со шовинистички пароли.

Таткоми ми објаснуваше и за
сексуалната револуција без граници,
но колку што го разбрав, заклучив,
тешко на мајками, овај кизнај шо и’ има праено.

На часот по анатомија ги помешав
латинските имиња на сите органи, па мојот став
кон сеопштото битствување беше изграден
од позиции на моите уринарни органи

И секогаш летав со брзина на фантазијата,
за разлика од Ајнштајн кој летал со брзина на светлоста,
но јас никогаш неможев да ја објаснам формулата
за црно белите дирки на моето пијано.

Мојата ученичка легионарска чест заврши
во конц логор ограден со бодликави мисли
во комора за екстерно под тушот прашања
кои ги нема во ниту една географска енциклопедија.

А добриот стар школски дневник по навика
ми додели диплома која вреди колку згужвана
географска мапа за исчезнатата Атлантида и
на која пишува: Кинескиот зид нема врата.

Смрт на едноумното памтење,
ајде се да заборавиме.
Умеењето нека биди хармонија
на некоја нова географија и времеплов.

 

[Grupa Seirdzii]

АКО ЛАЖИ АФОРИЗМОТ, ЛАЖИ И ВИСТИНАТА

ПРЕМА ПРЕСМЕТКИТЕ ЗА ЛИНЕАРНО ЗГОЛЕМУВАЊЕ НА ПЕНЗИИТЕ,
ОРДЕНОТ КОЈ МУ БЕШЕ ДАДЕЛЕН НА ПЕНЗИОНИРАНИОТ АМЕРИКАНСКИ ПРЕДСЕДАТЕЛ
ВРЕДИ 12 ДОЛАРИ. ВО ДЕНАРСКА ПРОТИВРЕДНОСТ.

НИ СТАП НИ МОРКОВ, НИ ЛЕБ НИ ЧОКОЛАДО.
ОД ПРЖИНО НЕ МАЧКААТ СО ПРЖЕН АЈВАР.

СЕ РАСТУРИ КОАЛИЦИЈАТА.
ДРЖАВАТА ЈА НАПУШТИ ВЛАДАТА.

НЕКОИ ПОЛИТИЧАРИ ФАТИЈА МАГЛА.
ОТКАКО ЗАДУВА ВЕТАР ВО МАГЛА ОД ЗАПАД, СЕВЕРО - ЗАПАД.

ВО ТРАНЗИЦИЈАТА НЕКОИ ИЗГРАДИЈА И КРАЛСТВА.
СО ЗАКОНОТ ЗА ДИВОГРАДБИ ЛЕГАЛИЗИРАВМЕ ЦЕЛИ МОНАРХИИ.

СЕЛСКИТЕ ВОСТАНИЈА ОД ИСТОРИЈАТА БЕА ЗАДУШЕНИ ОД ТИРАНИ.
ГРАЃАНСКИТЕ РЕВОЛУЦИИ ОД ТРАНЗИЦИЈАТА ГИ ЗАДУШИ ДРЖАВНАТА АДМИНИСТРАЦИЈА.

СОСТОЈБАТА СО ВРАБОТУВАЊЕТО СЕ ПОДОБРУВА.
НА ЕДЕН ВРАБОТЕН ВО АДМИНИСТРАЦИЈА ВО ДРЖАВАТА,
ПЕТМИНА СИ ОДАТ ОД ДРЖАВАТА.

БЕГАЛЦИТЕ ТРЕБАШЕ ДА ГИ ЗАДРЖИМЕ ТУКА.
МАКЕДОНИЈА ПОВТОРНО ЌЕ СТАНЕШЕ ДРЖАВА СО ДВА МИЛИНОНИ (РАСЕЛЕНИ) ЖИТЕЛИ.

ГИ ПРИБЛИЖИВМЕ МЕЃУДРЖАВНИТЕ СТАВОВИ СО НАШИТЕ СОСЕДИ.
ШТО ПОНАСТРАНА ДА СЕ ДРЖИМЕ ЕДНИ ОД ДРУГИ.

ИСТОРИЈАТА СЕ ПОВТОРУВА.
КАЈ НАС ТОА Е ОД ЗАВЧЕРА, А ВЕЌЕ УТРЕ.

ЗА КОДОШИТЕ СЕ ПЕЕ ВО НАРОДНИТЕ ПЕСНИ.
ТРАДИЦИЈАТА ЌЕ ЈА ПРОДОЛЖАТ СВИРКАЧИТЕ СО ТУРБО ФОЛК (ПРИСЛУШНАТИ) ЗВУЦИ.

ВЕРСКИ СУМ НЕОПРЕДЕЛЕН, СЕКСУАЛНО НЕОДРЕДЕН,
ПАРТИСКИ НЕОБОЕН, ПРОФЕСИОНАЛНО ШМИНКАН.
ДОБРА ОСНОВА ЗА ОБВИНИТЕЛ.

НЕБИДИ ГЛУП КАКО ПОЛИТИЧКИ МИТИНГ,
МУ РЕЧЕ ПЕТИЦИЈАТА НА СОБИРОТ ГРАЃАНИ,
И СВРТИ НОВ ЛИСТ.

ВИСОКАТА И СРЕДНАТА КЛАСА СЕ РОДНИНИ СО ПРИВИЛЕГИЗМОТ.
НАЈ ДОЛНАТА КЛАСА ЌЕ СИ ОСТАНИ ЗБРАТИМЕНА СО СОЦИЈАЛАТА.

ВЕТУВАЊЕТО ЗА СРЕДНА КЛАСА Е ХЕДОНИЗАМ.
УМЕТНОСТА НА ЖИВЕЕЊЕ ЌЕ ОСТАНИ ЦРТЕЖ НА ХАРТИЈА.

ИЗБИРАЧКИОТ СПИСОК СО СЛИКИ ОД ГЛАСАЧИТЕ КАКО КОЛЕКТИВЕН НЕКРОЛОГ
ИЗГЛЕДА НОРМАЛНО. ВО УМРЕНА ДРЖАВА.

И ТАТКОВИНАТА И МОЈОТ МАЈЧИН ЈАЗИК БЕА ЛОШИ РОДИТЕЛИ.
СЕГА СУМ ДЕТЕ НА ПАРТИЈАТА.

СО ИМЕТО, СТАНАВМЕ ПОЗНАТИ НИЗ ЦЕЛ СВЕТ.
АХ, ДА БЕВМЕ КОКА-КОЛА.

ФУДБАЛОТ ГО ПРОМЕНИ СВЕТОТ.
ЗЕМЈИНАТА ТОПКА СТАНА РАВНА ТРЕВНАТА ПЛОЧА
ПО КОЈА САМАТА СЕ ТРКАЛА СО ЗАЛЕТ ЗА ШУТ ВО АУТ.

СО ЕДНАТА НОГА Е ВО ГРОБОТ.
РАЦЕТЕ МУ СЕ СЛОБОДНИ, УШТЕ КОПА.

ЌЕ ВЛЕЗИМЕ ВО УНИЈАТА,
НО ДАЛИ И ТОГАШ ЌЕ СЕ СЕТАТ НА НАС.

ПРЕД ИМЕТО НА МОЈАТА ТАКОВИНА
НАЈ ПОВЕЌЕ БИ ОДГОВАРАЛА ПРИДАВКАТА „ГОЛЕМА“.
ВО МАЛА ЗАГРАДА.

ГИ СПРЕМИВМЕ ЗА ПОВТОРНО ВЕНЧАЊЕ,
КАКО ШТО ПОРАЧА ВЛАДИКАТА,
А БАБА И ДЕДО ПОМИСЛИЈА ДЕКА ГИ СПРЕМАМЕ ЖИВИ ДА ГИ ЗАКОПАМЕ.

 

[Grupa Seirdzii]

ОД ДРУГАТА СТРАНА НА ЕСТЕТИКАТА

кога ќе засветли
представата во два чина
се претвора во пауза

на заткулисни игри

на сценаристи и
сценографи
на актери и
режисери
на гардеробери и
портири

во потрага по ликот

жив ли е’
мртов ли е’
смртта негова
во која од следните епизоди
треба да биди
се реплицира рефренот
драма
драма треба да се случи

од другата страна на естетиката

откако по паузата
публиката
подготвена за жртва
се враќа во мракот
и стравот
од крвопролевање
во екстаза
соблазнета и собудена
пред сопствените очи
на сцената да ја види

смртта на својот лик

мирно
премногу мирно
е меѓу
портирот

 

[Grupa Seirdzii]

АКО ЛАЖИ АФОРИЗМОТ, ЛАЖИ И ВИСТИНАТА

ОД ТУРСКИТЕ СЕРИИ НАЈ ИНТЕРЕСНИ МИ СЕ ОНИЕ СО ПУТИН.

НА СЛЕДНИТЕ ИЗБОРИ ЌЕ БИДИ СЛИЧНО КАКО ВО „НАША ЉЕПА“.
ТАМУ ТРЕБА ДА ПРЕСЕЧИ „МОСТ“, КАЈ НАС ГИЉОТИЊАТА.

ВО ПОСЛЕДНАТА ПРЕПОРАКА ДОБИВМЕ ОЦЕНКА ТРИ.
АКО Е ТОА ШКОЛСКА ОЦЕНКА, ТРОЈКАШИТЕ БЕА НАЈ ГОЛЕМИ СИМУЛАНТИ.

ЗАДОЛЖУВАЊЕТО СО КРЕДИТИ ЗЕМИ ЕДЕН ВРАТИ ДРУГ СЕ ЗИДА ПИРАМИДАЛНО.
ФАРАОНИТЕ ГРАДАТ КОЛЕКТИВНА ГРОБНИЦА, ЧОВЕЧИЊА !?

НЕ ОЧЕКУВА ТЕХНИЧКА ВЛАДА.
ТЕХНИЧАРИ ЗА ОДРЖУВАЊЕ НА ЗГРАДАТА ИМА СЕКОГАШ ДОВОЛНО.
КОЛКУ СТИРОПОРОТ ЌЕ ИЗДРЖИ !?

САКАМ ДА ВЛЕЗАМ СО ПРЕДЛОГ ВО ИЗБОРНАТА ПРОГРАМА.
СО ЕДНО СТОЛЧЕ ВО ПАРЛАМЕНТОТ КОЛКУ ЕДЕН МАНДАТ ДА СИ ПОСЕДАМ.

ШЕГОБИЕЦОТ ИТАР ПЕЈО ПОВЕЌЕ НИКОЈ НЕ ГО СЛУША.
ВЛАСТА СЕ СЛУЖИ СО МНОГУ ПОГОЛЕМИ ИТРОШТИНИ МЕЃУ СЕЛАНИТЕ.

„И ДРУГИТЕ ДА ДОЈДАТ НА ВЛАСТ, НЕМА НИШТО ДА СМЕНАТ“.
ЗАТОА ОТОМАНСКАТА ВЛАСТ НЕ ЈА СМЕНИВМЕ ПЕТ ВЕКА.

САКАМ ДА ЈА ПРЕГРНАМ МОЈАТА ТАТКОВИНА.
НО ДАЛИ СО ИЛИ БЕЗ НЕЈЗИНИОТ ФЕДЕРАЛЕН ДЕЛ.

ДОКТОРОТ МИ ЗАКАЖА „МОЈ ТЕРМИН“.
БОГ ВЕЛИ ОД ПИШАНОТО НЕМА ДРУГ ТЕРМИН.
ЃАВОЛ ЌЕ ГО ЗНАЕ КОГА Е ВИСТИНСКИОТ ТЕРМИН .

НА СТРАНСКИТЕ ИНВЕСТИТОРИ ИМ НУДИМЕ НАЈ ПОВОЛНИ УСЛОВИ.
НИЕ СМЕ ПОЕФТИНИ ОД БИЛО КОЈ ЕКСПЕРИМЕНТ СО ГЛУФЦИ.

ГЛУПАВИТЕ МОЖАТ БЕСКОНАЧНО ДА СЕ ДЕЛАТ НА ЕДИНКИ.
ГЛУПОСТА БЕСКОНАЧНО СИ ОСТАНУВА ЦЕЛИНА.

ФИЛОЗОФСКИ Е ДА СЕ ЗБОРУВА ЗА ГЛУПОСТА,
НАУЧНО, КОГА ГЛУПОСТА СЕ ПОТВРДУВА ВО ПРАКСА,
УМЕТНИЧКИ, КОГА СЕ ПРОДАВА КАКО РЕМЕК ДЕЛО.

„ИДЕАЛНО НЕ ПОСТОИ. СЕКОГАШ МОЖИ И ПОДОБРО“.
ОД РЕТОРИКАТА НА ЕДНА ПРАТЕНИЧКА.

БИСТИТЕ НЕ УЧАТ ДЕКА ДОЛЖИНАТА НА КРАНОТ Е ЕДИНСТВЕНАТА МЕРКА
КОГА ТРЕБА ДА СЕ С(РАЗ)МЕСТИ НАШАТА ИСТОРИЈА.

СТАНАВМЕ БЕЗИЗГЛЕДНА НАЦИЈА.
НЕМАМЕ СУРАТ.

САМИ СИ ГИ ГАСНИМЕ ОГНИШТАТА.
ЗАТОА СИТЕ САКААТ ДА НЕ ПОТПАЛАТ.

СЛОГАН ПO МЕРКА.
ЦЕЛО Е КОГА СИТЕ СМЕ СИТЕ(Л).

НАЈПРВО НИ ОДЛЕТА УМОТ, ПА ПОТОА ДОЈДЕ ДО ОДЛИВ НА МОЗОЦИ.

ВОВЕДОВМЕ ПЛУРАЛИЗАМ НА ПАРТИСКИ ОПРЕДЕЛЕНИ И ПАРТИСКИ УПЛАШЕНИ.

НАМЕСТО МРТВИТЕ ГЛАСАЧИ, КАКО ПРЕДИЗБОРНО ИМ БЕШЕ ВЕТЕНО,
ВО ВЛАДАТА ВЛЕГОА МРТВИ ДУШИ.

ВО МНОГУ НЕШТА СМЕ МЕЃУ ВОДЕЧКИТЕ ВО ЕВРОПА.
ВРЕМЕ Е И ФУДБАЛСКАТА РЕПРЕЗЕНТАЦИЈА ДА СИ ЈА ПРОГЛАСИМЕ ЗА ВОДЕЧКА.

ЈА КОДОШЕШЕ МАФИЈАТА.
СЕГА Е ЛУСТРИРАН ПОДЗЕМИ.

СО ПАДОТ НА КОМУНИЗМОТ, ПАДНА И СРПОТ И ЧЕКАНОТ
ПО ГЛАВА ПО ЖИТЕЛ НА КВАДРАТЕН МЕТАР.

НА БАЛКАНОТ ИМА НАПРЕДОК.
МАЛИТЕ ДРЖАВИ КОИ САКАА ДА СТАНАТ ГОЛЕМИ,
СТАНАА СРЕДНО ЖАЛОСНИ.

НЕ Е ОД БОГА, МОРА ДА Е ОД ЃАВОЛОТ.
АФОРИЗМОТ Е КРАТОК, ПРИКАЗНАТА ЗА БОГ Е ЦЕЛА БИБЛИЈА.

 

[Grupa Seirdzii]

КРАЛ МАРКО СЕ ВРАТИ ВО ПРИЛЕП
ДА ЗИДА ДИВОГРАДБА


Крал Марко јавнат на коњ
се врати во Прилеп, народе.
( Се огласи Дуче Барабанџијата, гласникот на времепловите,
ширејќи ја веста низ заглувнатите градски маала)

И, навистина !?

Се издигнал Марко сред Прилеп на коњ бронзен,
узди затегнал, со боздоган замавнал,
Шарецот р’жи, на две нозе исправен се држи,
чиниш се поднего ќе цапни,
колку што некој за проектот ќе лапни
за таа грда структура, железна скулптура,
и (анти)култура.

Раширил Марко митови и легенди,
идат мртви и слепи војски,
на Црна Арапина пак глава ќе му сечи,
оживувa камени кралства под бетонски плочи,
со историчари полемизира, дебатира,
оправдува и гмечи.

Историјата, вели, за да оди напред
некој требаше да ги пропушти настаните.
Таа чест му припадна нему, вазалинот,
опеан од гусларот анонимен во митот
„Касно стиже Крањевиќ Марко на Косово поње“,
за рајата да го велича тоа пропуштено јунаштво векум,
набивани на колци од башибузуци клети,
стоечки и молкум.

Што прилепчани добија сега ?

уште една бронзена сенка
надвисната врз проблематичното минато,
скулптура со дилема за својата
дали уметничка вредност,
дали културолошко значење,
дали историско провидение,
излишен монумент во (не)организираниот простор,
амбивалентен,
привлекува со погледот
но заради својата насилничка одбивност,
примамлив,
но како бакарна ковина за крадци,
реквизит кој повеќе личи на сценски декор
за некаква си (локалпатриотска)
дворска козерија.

Кичот има совршена способност
да ја губи својата вредност.
Крал Марко нема да изгуби ништо,
како што недоби ништо.

Чекорам по прилепската калдрма.
Газам по урнатините и милоста на времето.
По стапките на предците. Чкрипат суви греди зад портите.
Ја веат белата прашина на моите расеани мисли.
Колку само таинствени митови и легенди крие
овај возбудлив град.

 

[Grupa Seirdzii]

АКО ЛАЖИ АФОРИЗМОТ, ЛАЖИ И ВИСТИНАТА

КЕЛНЕР !
УШТЕ ЕДНА ВОТКА „ПУТИН“ И ЕДНО ТУРСКО КАФЕ, ГОРKO.
КОЛКУ ЗА ОТРЕЗНУВАЊЕ.

НАШИОТ ВОДАЧ ВО ЗАМИНУВАЊЕ Е КАКО МЛАД ШЕГРТ.
ДУРИ МИСЛИШ (СИ)ОДИ ТОЈ СЕ ВРАЌА.

НИЕ СМЕ ЛУДАЦИ ! РЕЧЕ ПОЛИТИЧАРОТ.
„ТОЈ ДАР ВИСТИНАТА ДА НЕ РАЗВЕСЕЛИ БОГОВИТЕ ИМ ЈА ДАЛЕ
САМО НА ЛУДАЦИ (ЕРАЗМО РОТЕРДАМСКИ.)“.

КОГА ИСТОРИЈАТА ЌЕ СУДИ ЗА ПРЕСЕЛБАТА НА НАРОДИТЕ КОЈА Е ВО ТЕК,
ЌЕ РЕЧИ ДЕКА ТОА Е УШТЕ ЕДЕН БАЛКАН САМО ПОНАСЕВЕР.

ВОДИМЕ ПОЛУПИСМЕНА ПОЛИТИКА.
ДРУГАТА ПОЛОВИНА Е МАЛСКА.

НАПРАВЕТЕ СЕЛФИ ПРЕД МАКЕДОНСКАТА ФАТАМОРГАНА.
ПУСТИНАТА ПОЗАДИ ЌЕ ВИ ЈА НАСЛИКАМ ОПИСНО.

НАШАТА ДРЖАВА Е ДОМАШНА СУРОВИНА.
САМО ПРЕГОВАРАЧИТЕ СЕ ФИНАЛЕН ПРОИЗВОД ОД УВОЗ.

НАШИОТ КРАЛ НЕ Е ГОЛ.
НИЕ ОТСПРЕДИ МУ СЕ СЛЕКОВМЕ.

ВЛАСТА ИМ ВЕТИ АМНЕСТИЈА НА КРИМИНАЛЦИТЕ ДОКОЛКУ
СЕКОЈ ОД НИВ ДОНЕСИ ПО ДЕСЕТ КРИМИНАЛЦИ ЗА ИЗБОРИ.

ЦРКВАТА ВЛАДЕЕ ВЕЧНО ВО ИМЕТО НА БОЖЈОТО СТАДО.
НАШАТА ВЛАСТ НА ВЕЧНА СЛАВА И ХВАЛА НА ПАРТИСКИТЕ ТРЛА.

ЕПОПЕЈАТА СО ДЕЦАТА БЕГАЛЦИ ПАК НИ СЕ ПОВТОРУВА.
ОВОЈ ПАТ МАЛКУ ПОГОЛЕМИ ДЕЦА И СО ДИПЛОМА ВО РАЦЕТЕ.

ПО ТРАДИЦИЈА СМЕ ЗЕМЈА НА СИРОМАСИ И ИСЕЛЕНИЦИ,
И ДИЈАСПОРА СО ГОЛЕМА БЛАГОДАРНОСТ ЗА ТАКВАТА ТРАДИЦИЈА.

ЌЕ ГО ЛЕГАЛИЗИРАМЕ КАНАБИСОТ ВО ИНТЕРЕС НА ПАЦИЕНТИТЕ.
И ВО ИНТЕРЕС НА НАРКО МАФИЈАТА.

ИМАМЕ НИСКО НИВО НА БЕЗБЕДНОСНА КУЛТУРА,
И ВИСОКА КУЛТУРА НА НАЦИОНАЛНИ ПРЕДАВНИЦИ, КОДОШИ, ШПИУНИ...

ОРЕОЛОТ ОКУЛУ ГЛАВАТА НА ЛИДЕРОТ ИМ ДОЈДЕ ПРЕКУ ГЛАВА НА ГРАЃАНИТЕ
ШТО Е ДОКАЗ ДЕКА ПТИЧКАТА ПОЛЕКА ЌЕ ОДЛЕТА.

ГЛОБАЛНОТО ЗАТОПЛУВАЊЕ СО ЧАША ОЗОН НАЗДРАВИ ЗА НОВАТА ГОДИНА:
„ГАЈЛЕ МИ Е ЗА ЛАНСКИОТ СНЕГ“

КОЛОНАТА БЕГАЛЦИ СЕ ДВИЖИ ВО БРАНОВИ.
СВЕТСКАТА КРИЗА СЕЧИ, ЛЕПИ, МОНТИРА . . .

НАРОДОТ ЌЕ ОДЛУЧИ !
ПРЕСЕЧЕ ЛИДЕРОТ СО НЕКОЛКУ ГЛАВИ НА ОПОЗИЦИЈАТА.

КОГА НА ИЗБОРИ ГЛАСА НЕПИСМЕН НАРОД,
ЛЕКЦИЈАТА ЗА БЕЗГЛАСНИ БУКВИ СЕ УЧИ УШТЕ ВО ШКОЛСКИТЕ КЛУПИ.

КЛИЕНТЕЛИЗМОТ Е ДОБРА АЛАТКА ВО РАЦЕТЕ НА ВЛАСТА
СЕ ДОДЕКА НЕ ЗАИГРА МОТИКАТА КАКО АЛАТКА ВО НЕЧИИ ТУЃИ РАЦЕ.

ГАЈЛЕ МУ Е НА НАРОДОТ ШТО НЕМА СЛОБОДА НА ГОВОРОТ.
ДРДОРИ АКО НЕМАШ ДРУГА РАБОТА.

ПРИЛЕПЧАНИ ОВАА ЗИМА НЕМАЈА ПРОБЛЕМИ СО ОГРЕВНОTO ДРВО.
ГОРАТ СТАНОВИ, КУЌИ, АФТОМОБИЛИ, ОЏАЦИ ...

ПРИЛЕПСКИОТ СААТ Е НАВАЛЕН.
ЌЕ ПАДНИ КОГА ЌЕ ЗАПРИ ВРЕМЕТО.

ЗАПЛОВИМЕ РЕШИТЕЛНО.
НЕ САМО ТИТАНИК, ЌЕ ЈА ПОТОПИМЕ И САНТАТА МРАЗ.

ПОСЛЕ ТОЛКУ ГОДИНИ ПИШУВАЊЕ ЗА КРИМИНАЛОТ НА ВЛАСТА,
И МОИТЕ АФОРИЗМИ ВЛЕГОА ВО ИСТРАЖНА ПОСТАПКА.