Отсекогаш мостовите имале посебно место во историјата. Без разлика дали симболизираат бегство кон нови граници или се неразделна врска меѓу старото и новото, овие чуда на архитектурата нема да ве остават рамнодушни.
Секоја архитектонска изведба е уникатна по својата убавина, форма и конструкција. Погледнете го овие десет чудесни мостови, кои според изборот на Departures Magazine предизвикуваат вистинско внимание со величествениот изглед.
1. Таур Бриџ во Лондон, Англија
Изградбата на овој подвижен мост со должина од 83 метри започнала во 19 век, кога источниот дел на Лондон станал премногу населен. На градот му бил потребна нова структура за премин, но истата не смеела да го попречува речниот сообраќај.
Идеално решение за тоа бил мост кој се крева и спушта. Од 50 предложени архитектонски нацрти, одбран и спроведен во дело е овој модел чија градба е завршена во 1894 година. Во тоа време, Таур Бриџ бил најголемиот и најпрефинетиот подвижен мост кој некогаш бил изграден.
2. Голден Гејт во Сан Франциско, САД
Неговата изградба е завршена во 1937 година и претставува најпрепознатлив симбол на Сан Франциско. Во 1975 година, магазинот Rolling Stone го стави на својата насловна страна. Во текот на годината, мостот привлекува преку 10 милиони посетители.
Долг е 61 метар, а обоен е со карактеристична портокалова боја за да биде видлив низ маглата која постојано го прекрива градот.
3. Понте Векио или Стариот мост во Фиренца, Италија
Највисокиот и најстариот мост во Фиренца е изграден од камен и дрво. Поставен е над реката Арно, во нејзиниот најтесен тек. По должината на овој средновековен мост, се наоѓаат продавници кои до 16 век биле месарници. Но, војводата од Фиренца и Тоскана се пожалил од лошиот мирис и затоа месарниците биле заменети со златари кои до денес се тука.
Во 1944 година, нацистите добиле наредба да ги срушат сите мостови во Фиренца. Но, одлучиле дека Понте Векио бил премногу убав за да биде уништен. Наместо него, ги разнеле старите градби кои се наоѓале на краевите на мостот.
4. Мостот Кају во Исфахан, Иран
Исфахан е еден од најстарите градови во Иран, а во светот е познат по својата елеганција. Мостот Кају на реката Зајандех е изграден во 1650 година од шахот Абас, познат градител на повеќе џамии и палати во градот.
Мостот е познат како тајно, романтично место за криење на љубовниците од очите на јавноста. Дури и самиот шах бил толку восхитен од мостот, што побарал во внатрешноста да се изградат посебни простории за него и неговиот двор.
5. Мостот Аламилјо во Севиља, Шпанија
Шпанскиот архитект, Сантјаго Калатраваза го дизајнирал за Светската изложба во 1992 година, кога се прославувала 500 годишнината од патувањето на Колумбо во Америка.
Со своите 13 кабли, мостот се протега 140 метри во висина и ги спојува стариот кварт на Севиља со островот Картух, каде Колумбо живеел додека го планирал патувањето преку Атлантикот.
6. Мостот Бруклин во Њујорк, САД
„Овој мост е симбол на генијалноста и виталноста на жителите на Њујорк“- кажал Ед Кок, тогашниот градоначалник на Големото Јаболко во 1982 година.
Мостот е изграден пред 129 години од челична жица и ги поврзува Бруклин и Менхетен преку Ист Ривер. Овој висечки мост, прв од својот вид, во тоа време го симболизирал оптимизмот.
Покрај низата трагедии кои се случиле, меѓу нив и смртта на главниот инженер и уште 26 жртви во изградбата која траела 13 години, кога во 1883 година бил отворен, се здобил со епитетот осмо, светско чудо.
7. Мостот на воздишките во Венеција, Италија
Според неговиот изглед во стилот на Барокот, никогаш не би помислиле дека има мрачно потекло. Изграден е во почетокот на 17 век од бел варовник, со цел да ги поврзе инквизиторите од Дуждовата палата со затворот кој се наоѓал преку реката.
Наречен е Мостот на воздишките, бидејќи се сметало дека погледот на Венеција низ решетките на затворските прозори е последната глетка од надворешниот свет која затворениците ја имале пред својата смрт. Сепак, меѓу затворениците имало и ситни криминалци кои не биле осудени на смрт.
Како иронија на судбината, денес мостот има посебно значење за љубовниците. Според локална легенда, ако двајца вљубени за време на самрак се бакнат на мостот, тие вечно ќе се сакаат.
8. Мостот Ченгјанг во Санџианг, Кина
Во провинцијата Гуангси, на југот на Кина, народот Донг изградил традиционални мостови против ветерот и дождовите. Мостовите ги спојувале селата од околината, но исто така служеле и како места за собирање на народот, каде луѓето ги разменувале идеите.
Градбата на овој мост, изграден од дрво и камен, е завршена во 1916 година. Целиот мост е украсен со резби и слики кои се наоѓаат низ ходникот и на покривите на пет павилјони.
9. Стариот мост во Мостар, Босна и Херцеговина
Овој мост бил главна врска меѓу Отоманското царство и христијанскиот Запад. Оваа преубава градба ги спојува Босна и Херцеговина на културно и физичко ниво. Честопати опишуван како виножито кое се издига до Млечниот пат, мостот се протега низ Неретва веќе 400 години.
Во 1993 година, во текот на граѓанската војна мостот бил уништен, но повторно е реконструиран. Денес, претставува симбол на мирот и соработката, но истовремено е потсетник на тоа колку лесно можат да се расипат односите меѓу луѓето.
10. Спиралниот мост во Сингапур
Од досега прикажаните, ова е најмладиот мост кој се наоѓа на изборот за најубави мостови во светот. Изграден е пред две години и претставува вистинско технолошко чудо. Неговата форма е во вид на двојна спирала и служи како пешачки мост кој ги поврзува сингапурската марина и одморалиштето Марина Беј Сендс.
Навечер, мостот се трансформира во чудесна структура. Внатрешната спирала е прекриена со стакло и LED светилки. Обоените парови во црвени и зелени букви ги претставуваат четирите бази на ДНК (аденин, цитозин, гванин и тинин).
Во Фиренца и Венеција лично сум бил и сум ги посетил мостовите. Тој во Фиренца преубав е.
