Дарување крв или крводарителство е чин на некое лице кога доброволно дарува крв, којашто се користи за трансфузија или за производство на лекови преку процесот наречен фракционација.
Во развиениот свет најголем дел од крводарителите се неплатени доброволци кои што даруваат крв за потребите на заедницата. Во посиромашните земји, залихите се ограничени и крводарителите обично даваат крв тогаш кога му е потребна трансфузија на некој член од семејството или на пријател. Многу дарители даруваат крв од милосрдие, но има и такви кои се платени, а во некои случаи има и други начини на поттикнување, освен парите, како на пример платени слободни денови од работа за крводарителите. Еден крводарител може да дарува крв и за свои сопствени потреби во иднина. Дарувањето крв е релативно безбедно, но кај некои крводарители може да се појави модринка на местото каде што била ставена иглата, или да почувствуваат губење на свеста.
Кaј потенцијалните крводарители се прават проценки за сè што може да ја направи крвта небезбедна за употреба. Испитувањето вклучува тестови за болести што се пренесуваат преку трансфузија на крв, вклучувајќи ХИВ и вирусен хепатит. Исто така, се испитува и медицинската историја на крводарителот, а се прави и краток физички тест за да се утврди дека дарувањето крв не е опасно по неговото здравје. Колку често крводарителот може да дава крв има разлика во денови и месеци, врз основа на тоа кој компонент од крвта се донира, како и на законите во земјата каде што се случува дарувањето крв. На пример, во Соединетите Американски Држави, крводарителот мора да чека 8 седмици (56 дена) за повторно донирање на целокупна крв, а само 3 дена за донирање тромбоцити.
Количеството крв коешто може да се донира, како и методите на донирање, се разликуваат. Земањето крв може да се изведува рачно или со автоматизирана опрема, со којашто се земаат само посебни делови од крвта. Многу од компонентите на крвта којашто се употребува за трансфузија имаат краток рок на употреба, и оддржувањето на постојани залихи е постојан проблем.
Дали сте дарувале крв?
Досега 3-4 пати имам дарувано крв и ќе продолжам да давам и понатаму. Единствена причина поради која се одлучив да давам крв е тоа што мојата крв може да спаси нечиј живот.
Секој што може и сака да дава крв слободно нека дава, некој навистина е во потреба. Постапката воопшто не е болна и не е страшна.
Неколку факти околу дарувањето крв:
Дарувањето крв е доброволно, анонимно и бесплатно.
Крводарител може да биде секоја здрава личност на возраст од 18-65 години.
Жена може да дава крв на секои четири месеци, а маж на секои три месеци.
Дарувањето на крв не е болно, не создава навика и не му штети на организмот.
Материјалот за земање крв е за една употреба, така што дарувателот и примателот се потполно заштитени.
Пред секое дарување крв се врши лекарски преглед.
Дарувањето крв е корисно, со тоа што ќе го проверите вашето здравје.