Најомразен лик од книга (внимание - спојлери)

[Redhead]

Спротивно од омилените ликови и нивното воздигнување, во оваа тема сакам да коментираме за оние ликови омразените или неомилените како сакате наречети ги. Оние ликови кои ви предизвикале чувство на гадење, револт, омраза.
Ме интересира зошто баш тие ликови?
Воздржете се од кратки коментари освен името на ликот, објаснете макар биле и неколку реченици зошто баш тој лик не ви е омилен.

Еве мене на пример, еден од таков лик ми е Фердинад од Колекционер на Џон Фаулс.
Феринанд е еден од оние неприметни ликови кои секогаш се во сенката на другите луѓе. Тивок лик кој што живее по одреден шаблон, без никакви одстапки, заглавен во своите норми и принципи. По смртта на неговиот татко и напуштањето на неговата мајка (барајќи ја својата слобода подалеку од синот), тој започнува да живее со своите роднини. Лик на кој што границата помеѓу реалноста и фантазијата многу лесно ја преминува. Идеализирајќи ги жените фасциниран од нивата убавина (во конкретниот случај - Миранда),ги гледа како совршени експонати за својата колекција. Одкога ќе ја киднапира Миранда почнува неговата борба со нејзината личност, со нејзиниот карактер, обидувајќи се да ја зароби емотивно.

"Не знам што се случи, уште прв пат кога ја видов, знаев дека е единствената. Секако не сум ненормален, знаев дека е само сон и ќе си останеше така да не беа парите. Си мечтаев за неа, си измислував приказни во кои ја запознавам, правам работи што ја воодушевуваат, ја земам за жена и сето тоа. Ништо нечисто, тоа бидна по она што ќе ви го објаснам подоцна.
Единствено на ја сонував во убави соништа кога ќе ја видев со еден младич, бучно богаташко дете со спортски автомобил. Тие денови си дозволував да сонувам неубави соништа. Како плаче, или обично како клечи. Еднаш дури си дозволив да сонувам како 'и удирам шлаканица, како што видов едно типче на телевизија. Можеби токму тогаш започна се'."

Па, повелеле.

 

[Ghtalpo]

Од книгата Сестрата на Зигмунд Фројд можеби фраерот

Спојлер

што ќе ја лажи дека ќе ја земе за жена.

Читајќи ти доаѓа нагон да го извадиш од книгата и да го претепаш.

 

[The_Mayor]

Скриена во најмрачниот агол - Елизабет Хејнс
Страшно добар трилер, всушност сите ликови од книгата ме иритираат поготово главниот - Кети.
Како обемно ја опишува анксиозноста и стравот на Кети поточно деловите: Ја проверив вратата 6 пати, почекав 2 минути и повторно проверував, повторно 6 пати...всушност проверував до 9 вечерта додека не паднав од умор.
Итоа секој ебен ден тоа го прави во 2007ма година. А паралелно на тоа низ пасуси ја опишува и 2003та, каде секоја вечер се журка, полна самодоверба, запознава фраери, често има секс итн. И баш кога те крева и си викаш добро е станува интересно...пуфф 2007ма ете ја пак проклетата анксиозност (ОКР).
Иначе ви ја препорачувам.

 

[Luckky]

Највеќе мразам личности кои газат преку другите само за да ги исполнат своите зацртани планови и намери, а уште повеќе кога тоа го прават поради сатисфакција.
Затоа тука прв го спомнувам, Едмунд, од мојата омилена ,,Кралот Лир" од Шекспир.
Олицетворение на себичноста и материјалноста. Личност, за која не важат моралните правила туку само оние кои ќе придонесат во негова корист, а среброљубието и желбата за материјална корист е толку голема што поради тоа дури и самиот ја губи сопствената рака. Човек кој ги доживува како можност за сопствена заработка. Не постои љубов, само страст. Воден од ,,само за себе" а природата како единствена негова ,,господарка" наредува егзекуции, грабежи, предавства, братубиство и др.

Следната личност е исто продукт на Шекспир. Јаго од ,,Отело". Јаго е дури и ,,понапредна" верзија од она што е Едмунд зошто за разлика од него, сепак во Едмунд во одреден дел се јавува покајувањето. Лик кој во себе го содржи сето она подло што може да излезе на површина кај еден човек, а на жалост, е присутно во и околку луѓето. Лик, кој се крие зад лојалноста и искреноста а во суштина е сосема спротивното. Иако е претставен како човек од бескрајна доверба од страна на Отело, во Јаго се согледува неговата мрачна страна кога не го добива т.н унапредување. Неговата тешка манипулација со сите наоколку ( дури и со луѓето кои го сметаат за пријател, соработник и партнер) предизвикува одбивност. Неговите подли планови предизвикуваат низа трагедии кои сепак го стигнуваат. И да, некои луѓе не се каат за тоа што го направиле. Во самиот негов крај, самиот кажува дека се е така како што е, без тронка срам или покајание.

Наполеон во ,,Животинската фарма" на Џорџ Орвел, како реплика на Сталин. Искористувајќи ја својата репутација, која самиот ја лажира, успева на мошне едноставен начин да манипулира, лажира, измачува, криумчари, убие па дури и да ги предаде токму оние кои веруваа во неговата положба, оние кои веруваа во ,,идолот" што тој го изгради и самиот и најбитно оние со кои до вчера беше на иста страна и во иста позиција. Му симнувам капа на Орвел, за совршеното доловување преку неговите физички, симболички и психолошки анализи и описи.

И последниот лик ми е ѓ-ца Хевишхам, од ,,Големите очекувања". Одбивноста ми се појави поради фактот што ја користи нејзината приказна за да се одмазди на невини луѓе, и тоа повторно преку нејзината посвоена ќерка. Навидум за да ја заштити, преку својата опсесивност и параноичност неосновано и стереотипно планира одмазда.

 

[Аркантос]

Од ко ја видов темава до сега се мислам кој е најомразениот лик од сите книги што сум ги прочитал... и ми текна, ама не ми текнува како се викаше девојката.
Книгата е Девојката со бисерна обетка, а најомразениот лик ми е главната личност чистачката, таа што позираше, жената на месарот...
Само се мислам, дали го мразам тој лик поради што не ми се допаѓаат карактерните особини што ги има и начинот на кој што функционира, или пак не ми се допаѓа што Трејси буквално се има изгубено обидувајќи се да создаде некој лик.
Значи хаос. Срамежлива ја прави цело време - а првиот однос го има во сокак бе! Скромна ја прави цело време, а со срам се согласи месарот да ѝ биде маж.
Катастрофа лик.

 

[Outrider]

Баронот Данглар од `Гроф Монте Кристо`, прототип на расипан банкар before it was cool, капиталистичка скапаница од раната фаза на берзанските шпекулации, без ниту една човеколика карактеристика, на неговиот пат имаше само смрт, страдања и мизерија, сепак беше поштеден на крај, од нејасни причини. Но начинот на кој му беше одземено стекнатото богатсво на туѓ грб....е една од најгенијалните идеи за редистрибуција на капитал ever...

 

[Давор]

Најверојатно тоа ќе биде ликот на Бен Деј од книгата Мрачни места од Џилијан Флин. Мразам луѓе кои имаат потреба некои да ги контролира, да им кажува што да прават, како да прават, да раководи со нив. Тие се за мене малоумни, да не си способен да размислуваш самиот ами да дозволуваш да те контролира некој друг. Па после се, уште ја заштитува неговата сакана и неговата ќерка која се претвора во монструм (не е ни чудо после тоа од кој е одгледана).
Баш сакам да го изгледам филмот да излезе, да видам кој актер ќе го глуми Бен и како ќе го глуми. Ако се раководиме по имдб, Corey Stoll ќе го глумел возрасниот Бен, има наивна фаца човекот. Баш ме интересира како ќе се снајде во улогата.