Има уште 2 недели до крајот на годината, но не верувам дека ќе прочитам уште некоја книга бидејќи во моментот сум зафатена со The Beautiful and Damned на F. Scott Fitzgerald која е на англиски и има 417 страни. Предизвиков за жал го започнав од мај, што значи изгубив цели 4 месеци. Но, тоа е што е. Овие се книгите кои ги прочитав, но никогаш не запишував колку страници имаат, така да, ќе морам тој дел да го прескокнам:
01. На Пат, Џек Керуак
Му го обожавам стилот на Керуак иако далеку поубаво звучи оригинално на англиски, сепак ми се допадна изданието. Речиси автобиографска приказна поврзана со неговото патување низ државите во Америка (и при крајот и Мексико), многу дружење со разни луѓе слични на него, делумно идолизирање на Дин Мориарти, чат-пат по некоја девојка, доста алкохол и по некоја дрога... живот со мото во стилот "Имаш еден живот, искористи го максимум" а.к.а. yolo.
4,7/5
02. Frankenstain, Mary Shelly
Првото книгиче прочитано на англиски годинава, одличен избор. Испадна дека многу малку сум знаела за приказната поврзана со Франкенштајн. Бев позитивно изненадена и од приказната и од стилот на пишување, многу ми се допадна.
4,5/5
03. Страв и гадење во Лас Вегас, Хантер С. Томпсон
Книгава (а и филмот) не е за сечиј вкус. Многу шлакната приказна со уште пошлакнати ликови, мене невидено многу ме забавуваше книгава. Јас прочитав за 2 дена, читајќи ја по 3 саати (што значи ја исчитав за 6). Иако нема некоја посебна филозофија, целата приказна е како едно лудо возење на ролер-костер кое на крајот ќе те остави со насмевка. Само, преводот не беше нешто баш нај-нај.
4,5/5
05. Даблинци, Џејмс Џојс
Редно време беше да читнам нешто од Џојс, ја ископав книгава која ми била подарена во основно поради добар успех на крајот на годината (хихих). Не знаев дека е збирка раскази, така да, малце се разочарав. Имаше неколку кои ми се допаднаа, но се на се, доста досадна ми беше.
3/5
06. 1984, Џорџ Орвел
Книга на годината, а можеби и на животот. После оваа книга сите ми беа малце досадни. Неописливо добра приказна која ни на момент не ослаби, одлични филозофии и животни пораки кои те тераат не само моментално да размислуваш туку и да си го преиспиташ животот и ситуацијата на секое поле, убаво разработени ликови. Кога ја прочитав се осеќав духовно посилно, но и ми беше жал што ја исчитав. И сфатив дека ќе морам повторно некогаш да ја прочитам (најверојатно повеќе пати).
5/5
07. На дното и отфрлен во Париз и Лондон, Џорџ Орвел
Му го обожавам начинот на кој раскажува. Едноставен, но толку живописен. Ми се допаѓа што раскажува од свое искуство, пренесува тоа што видел и почувстувал и не се плаши да ги осети негативните страни на животот.
4,5/5
- Играта со стаклени ѕвона, Херман Хесе
Имав големи очекувања за книгава, а едвај исчитав третина. Толку ми беше досадна, се чудам како може да има толку позитивна критика. Читав со надеж дека нешто интересно ќе се случи, но на крајот после добри 150 страни, се откажав. За џабе си потрошив време.
1,5/5
08. Сликата на Доријан Греј, Оскар Вајлд
Имав грешна претстава за книгава се додека не ја прочитав. Очекував дека ќе биде некое романтично булшит каде некоја наивна девојка се вљубува во Доријан. Не да сум се излажала! Една од подобрите книги каде што ликовите се одлично обработени. Многу јака поента. Интересно одвивање на случките, постојано имаше некаква тензија. Топ книгиче.
4,8/5
09. Спутник Љубов, Харуки Мураками
Not bad. Ми се допадна ликот на Сумире и "демоните" со кои се бореше. Има доста живописен стил на раскажување, успеваше постојано да ми ја разбудува фантазијата. Но, не ми се допаднаа некои делови, кои не ги ни разбрав баш. Дали беа натприродни работи, дали беа метафори, не знам. Во секој случај, интересна книга.
4/5
10. Срамота, Џ. М. Котзи
Прв пат слушнав и за книгата и за авторот, но бидејќи е дел од колекцијата на Светски ѕвезди на литературата (мислам дека така беше) и не беше толку голема (таков ми беше периодот, не сакав да претерувам), ја земав од библиотека. Не беше лоша, но не беше ништо посебно. Главниот лик на таткото (заборавив како се викаше) ми беше до некаде интересен, но ќерката ме нервираше. Многу глупо постапуваше, иако знам дека тоа и беше поентата на целата книга. На некој начин, акцентот беше ставен на феминизмот.
3,8/5
11. Лолита, Владимир Набоков
Уфф, книгиште. Ми беа потребни 3 месеци (минимум) за да ја прочитам. Не знам зошто, но не можев да ја читам константно и брзо. Ми се допадна стилот на пишување, нешто слично на Орвел, едноставен, но живописен. Приказната е нешто што прв пат сретнувам, иако е малце грозна, сепак интересно е да се види неговата перпектива. На моменти заборавав дека се работи за девојче, не дека ги оправдував неговите постапки, едноставно него се му беше така нормално, како да не е ништо лошо тоа што го прави. Каква приказна, каков лик, ау.
4,8/5
- Најубавата жена во градот и други приказни, Чарлс Буковски
Покатастрофален превод немам видено. Секоја втора приказна беше несредена, немаше голема буква на почеток од речениците, на моменти имаше дури и англиски (заборавени, не преведени) зборови. Исчитав 6-7 приказни и ја баталив, не можев да издржам поради преводот.
- Ефи Брист, Теодор Фонтејн
И за оваа книга и автор немав слушнато и ја земав зошто е Светска ѕвезда. Исчитав повеќе од пола, ми остана околу третина. Но, едноставно не ми се допадна. Досадна беше, ништо интересно не се случуваше, и тоа дејствие што го имаше ептен споро се одвиваше. За џабе потрошив време.
2/5
12. Во чест на Каталонија, Џорџ Орвел
Ете, најпознатите дела му ги исчитав во 2015 и сега не знам што ќе правам. Оваа ме потсети на На дното и отфрлен во Париз и Лондон бидејќи слично раскажуваше и повторно, од искуство. Малце на моменти ми беше слаба приказната бидејќи имаше доста раскажување околу политиката во тоа време во Шпанија. Но сепак, има некој посебен дух во неговите приказни, не знам.
4,2/5
13. Смртта на Иван Илич, Лео Толстој
Книгиче од 100 страни со многу добра порака. Оваа ја исчитав за што знам, 2 саати. Толку се задлабочив што после тоа се осеќав ужасно. Ми беше жал и за ликот, ми беше тапа општо, добив црни мисли (што се вика) за животот. Како и да е, it makes you think.
4,5/5
- The Beautiful and Damned, F. Scott Fitzgerald
Сега за сега сум до 95 страна, што е едвај четвртина. Не знам дали ќе стигнам да ја прочитам, искрено толку ми е интересна и убава за читање, што нема да ја брзам. Дури може и да земам друга да читам паралелно, ем да ја завлечам малце (да уживам подолго во неа), ем имам 2-3 книги кои се помали, а сакам да ги причитам.
Епа тоа е тоа, технички успеав во предизвикот. За жал доцна почнав, но како и да е, кога станува збор за читање книги, никогаш не е доцна. Повеќе во наредната година!
Не беше мој избор. Чик-лит жанр со едноставен стил. Станува збор за Лендон кој се вљубува во девојка за која секогаш имал предрасуди бидејќи била бубалица, лошо се облекувала итн. Не препорачувам. Моја оцена - 2/5
