Возачка на 16 години само за одлични и примерни ученици
Доколу измените поминат без интервенции во законодавниот дом, шеснаесетгодишниците на кои учењето им е слаба страна и се немирни на часовите и во училиштата можат да се збогуваат со помислата да полагаат за возачка дозвола и ќе чекаат да наполнат полнолетство.
Овие услови стимулативно ќе влијаат на лошите ученици, велат во МВР
Само одличните и примерни ученици ќе ја имаат привилегијата да полагаат за возачка дозвола на шеснаесет години. Тоа е еден од условите пропишани во предлог-измените на законот за безбедност во патниот сообраќај што треба да им овозможи на постарите малолетници легално да седнат зад воланот.
Предлог-измените веќе се доставени до собранието и, според наши информации, на 1 март треба да се најдат во прво читање пред надлежната собраниска комисија.
Доколу измените поминат без интервенции во законодавниот дом, шеснаесетгодишниците на кои учењето им е слаба страна и се немирни на часовите и во училиштата можат да се збогуваат со помислата да полагаат за возачка дозвола на 16-годишна возраст. Тие ќе треба да чекаат да наполнат 18 години.
Покрај одличниот успех и примерното поведение, ученикот ќе мора да добие и писмена согласност од педагогот и психологот во училиштето. Доколку нема еден од нив, задолжителна е согласноста од класниот раководител. Овие документи треба да бидат заверени на нотар.
Предложените одредби изгледаат дискриминаторски и ги ставаат во нерамноправна положба малолетниците што сакаат да возат, но кои ете поради послабиот успех во училиштето не ќе можат да го направат тоа на легален начин. Тоа е во спротивност на основните заложби на предлагачот дека со возачка над 16 години ќе се спречат кражбите на автомобилите од своите родители. Наспроти тоа што кражбата на возило, па и да е на родителите, не спаѓа во категоријата примерно однесување.
Од МВР велат дека овие услови воопшто не биле дискриминаторски, туку напротив, требало да влијаат стимулативно на лошите ученици да станат одлични и примерни ако сакаат возачка на 16 години.
- Истиот член повеќе може да се гледа како мотивирачки. Нешто што дополнително би ги стимулирало постарите малолетници што сакаат да полагаат возачки испит, да покажуваат подобри резултати на училиште. Од друга страна, станува збор за предлог-измени, што значи дека тие сé уште не се усвоени од Собранието. Предлог-измените се дадени во собраниска процедура, така што очекуваме законодавниот дом сериозно да ги разгледа. Доколку има сугестии и амандмани за додавање или за бришење некои одредби од предлогот и тие бидат направени, ние сме должни да ги почитуваме - вели Иво Котевски, помошник-министер за односи со јавност на МВР.
За да добијат статус кандидат за полагање возачки испит шеснаесетгодишниците треба да исполнат еден куп услови, а и кога ќе ја добијат дозволата, според измените, им следуваат низа ограничувања.
Така, покрај стандардните услови што важат и за повозрасните кандидати, постарите малолетници ќе треба да добијат согласност од двајцата родители, старателот или законскиот застапник, заверена нотар, и да поминат 30 отсто повеќе наставни часови.
Кога веќе ќе ја имаат дозволата в џеб, нема да смеат да возат во периодот од 20 до 5 часот, освен ако не се придржувани од родител, потоа автомобилот не смее да биде со поголема моќност од 75 киловати. Брзината е ограничена на 60 километри на час јавен пат, 80 на магистрален и 100 километри на час на автопат. Не смее да влече приколка и да превезува деца.
Ако прекрши некоја од овие одредби, казната е 300 евра и забрана за возење во период од три месеци до една година.
Услови за возачка
- да има наполнето 16 години
- да поседува лична карта
- да е здравствено и психофизички способен
- завршено најмалку основно образование
- согласност од двајцата родители, законскиот застапник или старателот, заверена на нотар
- да има одличен успех и примерно поведение
- писмена согласност од психологот и од педагогот од училиштето или класниот раководител, заверена на нотар
- не смее да управувавозило од 20 до 5 часот, освен во придружба на родител - да вози со брзина до 60 километри на час на јавен пат
- моќноста на автомобилот до 75 киловати
- не смее да влече приклучно возило
- не смее да врши организиран превоз на деца
Што мислите за овој предлог на законот за безбедност во патниот сообраќај ?
-Во ред ли е 16 годишни тинејџери да седнат зад воланот и да управуваат со патничко возило?
-Сметате ли дека се доволно возрасни за да учествуваат во патниот сообраќај?
-Воедно,сакам и ваше мислење за почетниците возачи кои што треба да чекаат 2 години возачко искуство за да можат да искочат во град со кола
пошо не смее да се вози од 23 до 5 часот освен ако до него нема совозач од 25 години ?
