Овие четири златни дечиња – братчиња живеат тежок живот, но најтешко се чини е за нивниот татко кому солзи му се полнат очите што нема како повеќе да им помогне на своите деца. БезПардон се приклучува на акцијата за помош на четирите дечиња од велешкото село Слп, кои немаат пари ни за кифла, а ја објави весникот Вечер. По нивната објава, се сплотија сите корисници на социјалните мрежи и организираат акција за помош. Во акцијата која ќе се одржи во сабота во 17 часот во кафулето Енигма, сите можат да донираат облека, школски прибор и прехрамбени продукти. Бидете хумани отворете го вашето срце… Малку од нас некому значи многу.
Приказната на Игор, Спасе, Никола и Филип ја потресе јавноста. Дечињата се на возраст од седум до 13 години и секојдневно патуваат со воз до Велес за да одат на училиште. Тие пешачат по десет километри и од селото доаѓаат на станицата каде со часови го чекаат возот со кој одат до училиштето и назад. Нивниот татко Ванчо со тешка мака ги гледа неговите чеда како се измачуваат, а неговите деца не добиваат ниту кифла за ужинка како останатите деца во училиштето.
„Срце ми се стега секое утро кога ги носам на воз, тие толку многу сакаат да одат на училиште, но жал ми е што патуваат толку далеку, посебно што зиме мрзнат… мои деца се, срце ме боли“, вели Ванчо.
Ванчо имал плата од 15 000 денари и добивал детски додаток, а сега зема седум и ништо не добива за децата. И покрај сите ветувања, никој не им помага. Ванчо вели дека институциите со години им ветуваат помош, која ја добиле само еден месец и потоа престанала. Единствено што тие бараат е да им бидат платени месечните карти за воз кои чинат 50 евра и децата да добијат барем една кифла.
Ванчо е прогласен за технолошки вишок од Колска каде што работел.
„Земам само седум илјади денари од бирото. Повеќе не плаќаат за патните трошоци. Ниту храна во училиштето не им даваат. Нивното школување скапо ме чини“, очајно вели таткото.
За трагедијата да биде уште поголема неодамна му бил укинат месечниот паричен надомест за детски додаток. Никој не му објаснил зошто му е укината.
Секој кој сака да помогне на несреќното семејство нека се приклучи на акцијата за помош на Игор, Спасе, Никола и Филип.
Отворена е жиро сметка на која можете да ја дадете Вашата помош за овие четири дечиња.
200001425395689 Стопанска банка, Ванчо Попов.
Преземено од: БезПардон.Мк
